Shillong:Ka Hynñiewtrep National Youth Front (HNYF) East Khasi Hills, mynhynnin ka sngi, hapoh ka jing ïalam u General u Bah Donlang Nongbri ryng kat u Assistant General Secretary, u Bah Tyllibor Swer, ki la hiar ban leit khynra Licence ïa ki dukan thoh tim sa sha ki thaiñ Jhalupara ban lap la kine ki dukan thoh tim ki biang ne em ki kot ki sla kaba ki dei ban pynbiang.
Ha kane ka jingjurip, ka seng ka la lap jan baroh na ki dukan ba shong da ki bym dei ki Khasi kim don satia ïa ki licence bad ka seng, ka ong ba ka lap tang katto katne hi kiba don licence kata ruh tang ki dukan ki Khasi.
Haba kren sha ki lad pathai khubor, u Bah Donlang Nongbri, u la ong ba kane ka jingbym pynbiang ïa ki licence da ki dukan bad ka jingbym shimkhia ka sorkar ban pynbor ba ki dei ban pynbiang ka pynlong ïa ka jingduh ei da ki bun klur ka khajna ha ka shisnem kaba pynlong pat ïa ka jinghiran ka pla tyngka jong ka sorkar.
Shuh shuh u la ong ka seng, ka dawa na ka sorkar lyngba ka tnad Taxation Department ba ki dei ban wan khynra ïa kine ki dukan bad ba kam dei ban ailad ba kin plie khlem pat da ïoh ki license na ka sorkar.
Shuh shuh ha ka jingkhynra ka HNYF ki dukan tim ki ïathuh ba ki don ki briew jong ka sale tax kiba ju wan lum pisa man u bnai 2,000 da ka jingkular ban pynïoh licence ïa ki. Ha kane ka jingkhynra ka HNYF ka lap ruh ba kiba bun ki dukan thoh tim kiba ïoh ïa ka kot thoh number na ka sorkar katba ha kine ka kot ym shem la don satia kino kino ki licence number kiba dei ban thoh ha ka por ba ai ïa kine ki kot sha ki dukan thoh tim.
Ka HNYF ka maham tyngeh ruh ïa ki trai dukan ba kim dei satia ban plie ïa ki dukan jong ki khlem pat da ïoh ïa ki licence bad ka dawa ruh na ka sorkar ba ka dei ban khynra ïa kine ki dukan bad lada ka sorkar ka sngewthuh ba ka duna nongtrei, ban leh ïa kane, na ka liang ka HNYF, ka long kaba la kloi ban ïarap ïa ka sorkar ong u Bah Donlang.
U Bah Donlang u la pynrem jur ruh ïa ka tnad Sale tax, namar ka jingbym shimkhia ban khynra ïa kine ki dukan wat hadien ba ka seng ka la dep ban ai jingtip halor ka jingbym don licence kiba bun ki dukan thoh tim.
Kine Kim ai tax tangba ki ai indirect tax iano re iano bad kata ka shong haka jingstad Jong phi ban sngewthuh ..Ki illegal tax collectors ki dei hi kito kiba smat pynkiew iaka marbam.Baroh ki.nongmihkhmat khasi ki lah fail bad ka por ka ka lah dei ban nym ailad shuh ia kine kiba rim..Um dei ban kyrshan ia kito kiba wan na sengbhalang background ne family dynastic politics.Ki biej ki tare pisa ban syllang shyrta jingim…ahh kaei ban Jia ia kane ka jaidbynriew