Ka sorkar MDA, ka sorkar ba bamsap tam ha ka jylla, ong u heh khaii dewiong

illong: U bah Regeenal Shylla, u President ka Jantia Hills Public Coal Miners Dealers and Supplier Association, u la kynthoh jur ia ka sorkar MDA ba ka dei ka sorkar ba bamsap tam ha ka jylla.

Na ka liang u bah Shylla u la ong “Ka jylla Meghalaya ka don hapdeng ka jingiaid lynti kaba jynjar bha mynta, hapoh ka jingsynshar jong ka Sorkar MDA la mih bun bah ki kam bamsap ha baroh ki bynta bad kiba la sdang ban paw pyrthei man ka sngi da ki kam ka bor mariang kum ka jingtrei torti ia ka jingkieng dwar ksuid, ISBT, jingkieng Surok Mawlai Bye-Pass, ka jinghap u Dome ka Legislative Assembly building bad ka jingsdang orpait ka building ka kolej sorkar ha Patharkhmah”.
” Kita kiba don ha ka bor synshar ki lah ban jubab da ki nia ba bun rukom ban thet kti ia kata ka jingbamsap, hynrei to tip ba u paidbah kum u Nongbisshar ba stad u tip bad u sngewthuh ia ka jingjyrsieh ka synshar khadar” u la bynrap.

” Lada kum ki nongsynshar ba don ha ka liang sorkar ki sngew ba kam don kata ka kam bamsap, ki la dei ban mih shakhmat ban phah tohkit ia baroh ki jingkynnoh bamsap da ki kynhun tohkit ba laitluid bad ban pynpaw pyrthei wut wut ia ka kaiphod ba ki kynhun tohkit ki lap, khnang ban weng ia baroh ki jing artatien u paidbah ba bun ba lang”u la ong .
U la bynrap ruh “ka kam bamsap kaba shyrkhei tam ka mih na ka jingkhang ban tih ia u dewiong na Jaiñtia Hills, Garo Hills bad West Khasi Hills kaba une u mar u don, Khamtam haba la wan synshar ka MDA ka la wan ka jingtim ia ki lak ngut ki briew kiba im ja na kane ka kam”.

“Ka Sorkar MDA ka la wan ha ka bor da kaba kular ba kan plie noh ia u dewiong, uba la khang da ka NGT ha u snem 2014,pynban ka jingsynshar bymhok ka MDA bad kaba plie lynti ia kita ki High level kiba dei ki dkhot ka MDA khamtam kiba dei na ka party NPP bad kiwei pat ki dkhot jong kane ka sorkar synrop, kiba la khat pisa na ka National Highway man ka miet da ka phew klur”u la ong.
“Lah ban pynsakhi ia kane ha ka jinglap jong u Cheif Justice u Mr. Sanjeev Banerjee, uba la phah khang syndon ia ka jingshalan dewiong, hadien ba la lap ia ka jingtih dewiong tuh pyrshah ia ki rai bad ki hukum ba la pynmih da ka NGT bad Supreme Court,mynta pat la lap ia ka rukom treikam bad ka jingthmu ka sorkar MDA ban pynriewspah ia uba la riew spah bad pynduk ia uba duk da kaba pymih ia ka SOP, kiba long pyrshah ia ki kyndon ain jong ka MMDR Act bad Mineral Concession Rule ban ai ia ka kam tih dewiong ha ki kti jong kita ki High level”u la bynrap.

U la kdew ruh “Ha ka snem 2019 ka sorkar BJP ha Delhi, ka la pynjynsur ia ka kam tih dewiong da kaba ithuh ia ki hok jong ki trai par, da kaba wanrah ia ka jingpynkylla ia ka MMDR Act 1957 bad Mineral Concession Rule 1960, da kaba pynsuk ia ki kam tih dewiong da kaba ithuh ia ki trai par ha ka juh ka kyrdan bad kano kano ka Sorkar jylla hapoh ka rule 27 jong ka Mineral Concession Rule, 1960. Hynrei ka sorkar MDA ka khlem leh ia kane, phewse pynban ha ka SOP jong ka Sorkar MDA, la long trai noh da ka sorkar MDA”.
“Ia ki par jong ki paidbah la knieh da ka Department of Mining and Geology, Government of Meghalaya. Kaba I thamula ha ka SOP ka long ba kata ka MMDR Act 1957 bad ka Mineral Concession Rules 1960 kim buh ia kata ka mininum ne kaba duna eh ka jaka tih dewiong, hynrei ka sorkar MDA ka buh ba hap don 100 hectare (220 acres) ban don hok ban pan ia ka prospecting licence bad Mining lease”u la bynrap. “Kane ka long be-aiñ bad la paw tyngkrein ba ka sorkar MDA u Conrad Sangma, uba dei ruh u minister ka Mining and Geology. Ha kane ka rukom treikam ba la wanrah da ka sorkar MDA la ai lad ia ki Heh spah, kita ki coal mafia lane ki High level ba kin knieh noh ia ka hok jong ki barit baria namar ia ki Prospecting bad Mining Lease la bat da ki heh spah jong ka NPP, UDP bad kiwei kiwei”la u president.
U la bynrap ruh “Kumta ka la poi ka juk ba u ba riewspah u nang riewspah bad u ba duk u nangduk, Ka sorkar MDA ka wanrah ia ka rukom synshar kaba long pyrshah ia ka synshar paidbah bad ka hok trei mon laitluid, kaba long be-aiñ haduh katta katta,Ka dei ban pynduh noh ia kane ka SOP bad ka dei ban pyntreikam ia ka chapter 6 jong ka MCR kaba la tyrsat ha u 2019 ha kaba baroh ki don hok ban trei dewiong”.

U bah Shylla u la kynnoh ruh ” Ia ka MMDR Act la dep pynkylla biang ha ka snem 2021 ha kaba la pynkupbor ia ka sorkar India ba kan pynbna ia ka jingtreikam jong kane ka ain ha baroh kawei ka ri India lane tang shi bynta. Hangne ngi hap ban buh ka jingkylli ba balei ka Sorkar MDA haba u Chief Minister kum u Mining Minister u la dei ban tip ia kane Ka jingpynkylla, balei la leh ia kane ha ka 23 tarik u March, 2021? Hynrei ka Sorkar Meghalaya , khlem ka jingai jingujor ne ka jingkyrpad ban weng noh ia ka ka jingtreikam jong ka MMDR Act na ka jylla Meghalaya”.

U la bynrap ruh “Ha kajuh ka por ruh ki khlem don ka jingpyrshang kaba tikna lane kaba bud hok khamtam ban pynkylla ia ka MMDR Act lyngba ka jingpynbna u President hapoh ki kyndon jong ka Para 12AB jong ka Sixth Schedule namar ba ka MMDR Act ruh ka la buh ia ki kyndon kiba kyrpang lane kiba lah ban pynkylla ia ki kyndon jong ka MMDR Act ha ki jaka jong ki Autonomous District Council, khnang ba kan nym pynthut ia ka kamai kajih lane ka jingtrei jingktah jong ki paidbah Tribal kum ki Khasi-Pnar bad ki Garo ia ki marpoh khyndew khamtam ia u dewiong”. ” la dei ka por ban pynkut noh ia kane ka jingkamai tuh, ka jingkamai bymhok bad ka jingtih dewiong na ki National Highway da ki High Level ,bad ia kane, donkam ba ki paidbah kin sngewthuh ba ka hok ka dei ka jong ki.

Ka MMDR Act lada pyntreikam iaka ha ka rukom kaba dei, khamtam ia ka Mineral Concession Rules kaba mih na ka MMDR Act, 1957 ka don ka lad ba ki trai khyndew kiba long ki trai ia ka khyndew bad ki mar ‘poh khyndew ba kin pyntreikam ia kane kumba la kdew ha ka 3 CMR Jacob, ka mukotduma ha kaba ka Supreme Court ka rai ba ka hok jong u trai khyndew kam dei tang ia ka khyndew kaba na jrong, ka surface rights hynrei u don ruh ia ka Sub-Surface lane ia ka hok ia ki mar poh khyndew kiba don ha kato ka jaka, u trai lane u private owner”u la bynrap . “Donkam ba ia kane ka hok ba la pynskhem da ka Supreme Court, kaba la pynskhem ruh da ka MMDR Act donkam ban pyntrei hok, ym ban knieh ia ka hok jong ki paidbah halor ka khyndew ka shyiap, ym ban pynbiang ia kita ki High Level, ym ban pynbiang ia kita ki Coal Mafia, ym ban pynbiang ia kita ki ‘lei san snem kiba shong hangtei hapoh Secretariat kiba shu lum ia ka spah bah, ka umsyep jong ki paidbah, khamtam kiba duk kiba shitom. Ka MMDR Act lada pyntreikam bha iaka kan nym shah ia kane”u la ong. “Nalor kata la ban biang ba ia ka SOP number 25 ba la pynmih ha ka 5 tarik u Lber 2021 Ia kane la dei ban pynduh pyndam noh da kaba ithuh ia ki trai par ha ka Ri Khasi-Jaintia bad Garo ha ka juh ka kyrdan bad ka state Government katkum ka Rule 27 jong ka Mineral Concession Rules, 1960 bad lada leh ia kane kamut ka hok jong u paidbah, ka hok jong ki trai khyndew bad ka hok jong ki trai par kan wan biang, namarba kumba ka long mynta ka sorkar MDA ka la knieh lut ia kine bad ngi kum ki paidbah ngi dei ban ieng pyrshah ia kine namarba ka kam be-ain, ka kam bymhok ka kam kaba lehbor kaba long pyrshah ia ka synshar paidbah”u la bynrap.