Khih kulmar, ki jylla bapher ka India, na ka skhim Agnipath, ba bitar ki samla ba kwah rung kam shipai

Patna: Ka skhim jong ka sorkar India, ka Agnipath, ka la pyn kylla madan thma ia ki jylla bapher jong ka India. Ka daw ka long ba kito ki samla kiba pynkhreh ban rung kam shipai ialade, ki la khie bitar bad pynkulmar shnong ha Bihar, na ka bynta ar sngi kynthih. Ki rel, ki la shah thang, ki kali ki la shah khang, ki bos ki shah lun maw bad U MLA jong ka seng BJP, ula mynsaw; na ka jingkhie bitar jong ki samla, ia katei ka jingthung kam, kaba tang khyndiat snem eh.

Katei ka jingkhie bitar jong ki samla, mynta, ka la nang pur sa sha Haryana, Uttar Pradesh bad sha kiwei de ki jylla. Ha Palwal jong ka Haryana, la khang internet bad sms, na ka bynta 24 kynta kynthih. Ki pulit, ki la bam lathi ia ki paidbah bad ki la siat sha suin, hadien ba ka la don ka jingthang ia ki kali ha katei ka jaka.

Na ka jingshah thang ki rel bad ka jingkhang lynti, la hap pynsangeh ia 22 tylli ki rel ha Bihar, mynta ka sngi, ong ka khubor. Kitei ki samla, kiba rah da ki lama “Indian Army lovers” ki la thang ia kawei ka jaka shong jong ka rel ha Bhabhua Road jong ka Bihar.

Ha Nawada, ka kali jong ka Aruna Devi, ka MLA jong ka seng BJP, kaba dang leit sha kashari, ka la shah lun maw bad ha katei ka jingjia, ki don 5ngut kiba mynsaw, ba kynthup ia katei ka MLA. Nangta ka ophis jong ka BJP ruh, ka la shah pynjot thiaw.

“Ki nongiakhih, imat, ki khie bitar, haba ki iohi ia ka lama jong ka seng, ki la tur sha ka kali jongnga. Ki la tar ia ka lama. U nongniah jong ka kali, arngut ki nongpahara bad arngut ki nongtrei jongnga, ki la mynsaw” ong ka MLA, haba kren sha ki kotkhubor bad ka iathuh ba ma ka, ka la syier thot thot, ia la ka jong ka jingim, ha katei ka khyllipmat.

Ka Agnipath, ka dei ka skhim jong ka sorkar India, ha kaba yn thung kam ia ki shipai, na ka bynta saw snem bad hadien kata, kin shongthait noh, tangba kin nym ioh bai bam tymmen shuh satia.

Katei ka skhim, ka plie lad ia 45,000 ngut ki samla, kiba ha ka rta kaba 17.5 snem bad 21 snem, ba kin rung sha katei ka kam, na ka bynta saw snem bad ha katei ka por, kin ioh ia ka tulop kaba T.30,000-40,000 lem bad kiwei de ki jingioh, kynthup ia ka bai dawai. Hadien ka saw snem, yn jied tang 25 percent na kitei ki shipai, ba kin trei pura, na ka bynta 15snem kynthih bad kiwei pat, kin shongthait noh, da kaba kin ioh hapdeng ka T.11-12 lak, khlem bai bam tymmen eiei ruh em.