Shillong:Ka Hynñiewtrep Youth’s Council (HYC) Riwar Mihngi Circle, mynhynnin ka 15tarik Jylliew 2022, hapoh ka jing ïalam u Samla Donald son Pyngrope President ka la leit ban aiti ïa ka dorkhas ha u General Mannager jong ka Jio ha Shillong ban dawa na kane ka Kompeni ka dei ban pynbiang ïa ki mobile network ha ka thaiñ Pynursla.
Haba kren sha ki lad pathai khubor, hadien ba mih na ka ophis jong u Genral manager u Samla Donaldson u la ïathuh ba kane ka jingbym biang ka network ha ki thaiñ Pynursla ka dei la bun bun bnai bad kaba pynlong ïa ki nongshong shnong jong kane ka thaiñ ban kynduh jingeh.
U Samla Donaldson u la ïathuh ba na ka liang u manager u la ai daw ba ka jingthud ka network ka dei na ka daw ka jingtih pynheh ïa ka surok kaba bunsien ki wire ki dkut na ka jingshah jynrat ha ka puh shilum kaba tih surok. U Samla Donaldson u la ïathuh ba na ka liang ka seng ka la kren da kaba shai ha khmat u manager ba ka seng ka ai por ïa kane ka kompeni shibnai ban pynbiang ïa ka network lem kumta na ka liang ka seng kan khang tala lut ia baroh ki tower kiba don ha ka thaiñ Pynursla.
Shuh shuh ka HYC ka dawa ba kiwei pat ki kompeni pynpoi network ba kynthup naduh ka Airtel, Vodafone, BSNL ba ki dei ban pynbiang network ha ka thaiñ Pynursla, lym kumta na ka liang ka seng kan shim da ka sienjam kaba tyngeh pyrshah ïa ki.
Kumjuh ruh na ka liang ka HYC Riwar Mihngi Circle lyngba u President jong ka u Samla Donaldson Pyngrope, u dawa ïa ki bor ba dei peit jong kine ki Kompeni ba kin pynthikna ba ka network sha ka thaiñ ka dei ban biang bad u la kyrpad khamtam ïa u Additional Deputy Commissioner East Khasi Hills &Nodal Officer Digital Connectivity East Khasi Hills ba un hukum ïa kine ki Kompeni ban pynthikna ban biang ka network khnang ba kan long ka jingmyntoi ïa ki nongshong jong ka thaiñ.
Phi don ban ong eiei?