Ngin weng ne em na ka sorkar U Conrad, yn rai ha Hyderabad, ong u heh BJP

Shillong:U President ka Bharatiya Janata Party (BJP) Meghalaya u bah Ernest Mawrie, u la ong ka rai ba ka BJP ha ka jylla kan dang neh lane kan weng noh ialade na ka sorkar Meghalaya Democratic Alliance (MD A), yn sa lah ban shim hadien ka jingpynlong ia ka National Executive Meeting ha ka jylla Hyderabad.

Haba ia kren bad ki lad pathai khubor, na ka liang u bah Mawrie u la ong “Ia ka rai ban weng lane ban dang neh ha ka sorkar MDA,ngin hap ban ap ia ka rai jong ki nongialam na Delhi bad ia kane ka phang ngin sa ia kren biang sa shisien ha ka jingialang jong ka National Excutive Meeting ka ban long ha ka jylla Hyderabad”.

U la bynrap “Na ka liang ki bor ba halor ka BJP ki la pan ia ki kaiphot na baroh ki jylla ban bishar halor ka jingtreikam bha ki sorkar ha kine ki jylla”.
U la iathuh “Ha ka 25 tarik u Jymmang ka la don ia ka jingialang jong ka State executive committee ki don na ki katto katne ki nongkit kam ki la ai jingmut ban mih noh na ka sorkar MDA bad na ka liang ki nongialam ha ka jylla ruh ngi la pynpaw ba ngi dei ban phah sha ki nongialam ka BJP bad ia ka rai ban weng lane ban dang sah bad kan long ha ka rai jong ki”.

“Ki MLA ruh kin hap ban ap ia ka rai jong ki nongialam ba halor la kin mih noh lane kin dang neh ha ka sorkar”u la bynrap.
Halor ka jingkren u bah Prestone Tynsong, u bah Mawrie u la ong “Ka dei tang ka jingkren jong u marwei ngam kwah jubab eiei bad ailad shwa ia nga ba ngan rah ia ka kaiphot ka ba na ka jylla bad ynda nga la wan phai ngan sa iathuh ia ka rai” .
Halor ka jingkynnoh u bah Pala “Kat kum ka jingkwah jong ka BJP ban pynlong ia ka jylla ban pyllait ia ka Congress na ka Ri baroh kawei ka la long ka ba jop bad mynta ka Congress kam don shuh shaei shaei ruh bad ka jingkren u bah Pala ka long ka jingkren jong u marwei”.
U la bynrap ruh “Haduh mynta ngim pat don ka jingialang MDA bad ngim pat ioh ban ia kren eiei, halor kino kino ki mat bad ruh ym shem la don kano kano ruh ki party kiba donlang ha ka sorkar MDA ba kin pynpaw ba ki la kwah ban ieh noh ia ka sorkar MDA”.