Hiar tyngeh ki result SSLC sha Garo Hills

Ka Meghalaya Board of School Education (MBOSE), ka dang shu pynmih shen, ia ka result jong ka Secondary School Leaving Certificate (SSLC) lane ka result jong ki samla kiba pule Class 10 bad ha katei ka result, la iohi, ba kiba pass baroh, ki poi sha ka 56.96 percent bad na kitei, ka East Jaintia hills, ka dei kaba wan ha jrong duh, da kaba ka don ia 82.36 percent bad ka West Jaintia hills, ka don 77.51 percent, ka East Khasi hills, ka don ia 75.05 percent bad na Khasi Jaintia hills, kaba tlot eh, ka dei ka Ribhoi District, da kaba ka don 63.60 percent.

Ha katei kajuh ka result, la iohi, ba ka West Garo hills, ka wan ha jrong duh, da kaba ka don 41.10 percent kiba pass, ka East Garo hills, da 39.31 percent bad kaba tlot duh na ka thain Garo hills, baroh kawei ka dei ka South West Garo hills, kaba don tang 26.45 percent kiba pass.

Haba pynwan da ka jingkhein, la iohi, ba ki don 24,930ngut kiba ialeh ia katei ka eksamin na ki 5 tylli ki district ka Garo hills, katba kiba pass, ki long 9,126ngut; katba kiba ialeh na 7tylli ki district ka Khasi, Jaintia hills, ki long 32,441ngut bad kiba pass ki long 23,552ngut.
Kane ka jinghiar palat ki samla pule sha Garo hills, ka la dei ban pyn pyrkhat jylliew ia ka tnat pule puthi, khamtam ha kaba kum ha kine ki sngi, ba ki iakren ia ka course jong ka CBSE, lane ka ICSE bad nangta sa ka CUET bad ka tnat pule puthi, ka dei ban ai, ia ka jubab kaba shai sha u paidlang ka jylla, ba balei ka result sha Garo hills, ka hiar palat lane ha kawei pat ka kyntien, ioh ba ka rukom set jingkylli, ka la eh than bad ka la dei pynban, ban nang kham pynjem ha ki snem, ki ban sa wan.

Ka wan ruh hangne, ka mat kaba kongsan bha ban iakren bad kata ka long ba ki ain jong ka sorkar India, ki la nang thew, ba ki skul, kin hap ban shim, da kawei ka syllabus kaba ki ia pule lang ha ka Ri India baroh kawei bad kumta ki skul jong ka Meghalaya, la ki la pynkhreh ne em ia kata, lane lada iakren ha kawei pat ka kyntien, ka long, la ka sorkar jylla, kan leh kumno ia kitei ki skul kiba tlot tasam bad ki bym lah ban pyn pass bha ia ki khynnah jongki, ha ka eksamin SSLC bad katei ka dei ka mat, kaba ka tnat pule puthi, ka dei ban pynbeit kyrkieh noh, ia katei ka mat ba kongsan eh.