Leit shong kyllain myngngor ki nongtrei MCCL, ba ki shah set tulop

Shillong: Ki nongtrei jong ka MCCL, mynta ka sngi hapoh ka shatri jong ka Mawmluh Cherra Cement Limited Employees Union (MCCLEU), ki la pynlong ïa ka jingshong kyllaiñ myngngor ha khmat ka ophis treikam ba heh duh jong kane ka kompeni ka Sorkar ha Shillong ban pynlait noh ïa ka tulop jong ki bad kiwei de ki mat jingdawa bad la sakhi ruh ba ka MDC na Nongshken ka Kong Grace M Kharpuri kaba dei ruh ka kyrtong ka ban ïakhun na ka seng NPP na Shella ha u snem u ban wan ka la wan ban ai mynsiem ïa kine ki nongtrei kiba ïakhih.

Haba kren sha ki lad pathai khubor na ka liang u President ka seng u Bah Shanlang Lyngdoh, u la ïathuh ba kat kum ka rai ba ka shim da ka Executive Committee jong ka seng kaba la long ha ka 9 tarik Jymmang 2022 ka la rai da kawei ka sur ban dawa ba ka sorkar ka dei ban siew tista ïa ka tulop jong ki nongtrei jong kane ka karkhana tad haduh ba kane ka karkhana kan lah ban treikam biang kumba ka ju long, ban ai lad ïa ki nongtrei ban shim ïa ka VRS ne ban shongthait da ka mon sngewbha kumba ju leh da ka sorkar barim haduh u snem 2017.

Haba jubab ïa ka jingkylli ba haduh katno klur kane ka pisa ka poi kaba ka sorkar ka dei ban pynlait sha ki nongtrei na ka liang u Bah Shanlang, u la ïathuh ba malu mala kane ka pisa ka kot kumba 200 klur eiei.

Shuh shuh na ka liang jong u Bah Shanlang, u la ïathuh ba ka seng ka dawa na ka sorkar ba ka dei ban pynsted noh ban shim ki lad ki lynti ban pyntreikam biang ïa kane ka karkhana khnang ba kan lah ban pynmih dewbilat biang kum ha ki snem kiba la leit.

Haba kylli pat la ka seng ka pdiang ne em ïa ka rai ka sorkar ban ïasnoh kti ne joint venture bad ki riew shimet bad pynïaid ïa kane ka karkhana na ka liang jong u Bah Shanlang u la ong ba ka seng hi kam don eiei ban ong ïa kane, namar ka jingïakhun kaba nyngkong eh hi ka dei beit ban dawa ïa ka hok ki nongtrei ym ïa kiwei pat ki mat.

Haba bynrap lang na ka liang ka Kong Grace M Kharpuri ka la ïathuh ba na ka liang jong ka ka la pyrshang ban ïakren bad ki bor ba halor ban sngap ïa ka jingdawa jong ki bad ban weng ïa ka jingeh kaba ki ïakynduh bad na ka liang ka sorkar ka la pyrshang ban leh ïa kaba donkam bad ka la ai khubor ruh ba ki bor ba halor ki long kiba ka kloi ban ïa kynduh markhmat bad ki nongtrei khnang ban ïakren halor ki mat jingdawa jong ki.