Nongpoh: Ki rang bad thei ialehkai ka Patharkhmah Basketball Team, ki la ioh ban khur ia ka nam lahduh ha ka lym pung ialehkai Basketball, kaba la tip kum ka 1st Spring Cum Summer Basketball Tournament 2022, kaba la pynlong da ka Patharkhmah Sports Club ha madan ialehkai Basketball ka Government Higher SS kaba don ha Patharkhmah.
La pynkut ia katei ka lympung ialehkai Basketball, da ka jingdon u bah Najim Kharmalki, Rangbah Shnong ka Patharkhmah, kum u kongsan ha ryngkat u bah Ripolas Nongtri lem bad kiwei ki riew rangbah ka thain. Haba phai sha ka jingiakhun ha katei ka sngi, ka jingiakhun ha ki Shynrang ka la long hapdeng ka Patharkhmah Govt Higher SS pyrshah ia ka Patharkhmah Basketball Team bad ha ka jingiakhun kaba itynnad, ki rangialehkai ka Patharkhmah Basketball Team, ki la lah ban pynliem noh 42-31 pyrshah ia ka Patharkhmah Government Higher SS.
Ha ka jingiakhun jong ki kynthei, kaba la long hapdeng ki thei ialehkai ka skul St. Peter’s SS Umkadhor pyrshah ia ki thei ialehkai ka Patharkhmah Basketball Team, ha kaba ki thei ka Patharkhmah ki la lah ban pynliem kput ki kynthei ka St. Peter’s SS.
Haba phai sha ki khusnam, ka kynhun lahduh ha ki Shynrang, ki la khur ia ka song pisa kaba T. 15 hajar lem bad ka Trophy, katba kaba shah rem ka la khur ia ka song pisa kaba T. 7500. Ha ki kynthei ka kynhun kaba la rah ia ka namlahduh, ki la khur ia ka song pisa ka T. 10 hajar lem ka Trophy, kaba la kynhun ba la shah rem, ka la khur ia ka song pisa kaba T. 5 hajar lem ka Trophy.
Phi don ban ong eiei?