La poi U Nailar, ki jylla dong mihngi, kim pat ia soi soskular kam pud

U Nailar, ula poi noh artad; lane kaba dei ruh, ka jingrakhe 75 snem jong ka India; hynrei, kata ka jing ia pynbeit pud, kam shym trei kam satia, hapdeng ki jylla bapher ka thain shatei lam mihngi, lait noh tang hapdeng ka Assam bad ka Meghalaya.

Kat ka jing ialeh thma ka Assam bad ka Mizoram, ka Assam bad ka Nagaland; hynrei, ym shym la iohi satia, ba ki nongialam jongki, lane ki myntri rangbah, kin ia khohreh ban ia suk lane ban ia pynbeit pud noh. Kham mynshwa, ha U Kylla lyngkot 2022, U Amit Shah, myntri kam poh iing ka sorkar India, ula khot ia ki jylla, ka thain shatei lam mihngi, ba kin pynbeit noh ia u pud u sam jongki bad ki jylla ba marjan, ha shwa ka jingrakhe 75 snem, kaba dei ha U Nailar 2022; hynrei katei ka jingkren jong u myntri kam poh iing, la iohi, ba ka rung jylliew tang ha ki shkor jong ki myntri rangbah ka Assam bad ka Meghalaya, katba kiwei pat ki jylla jong ka thain, wat la ki dei kiba la synshar hi da ka BJP, kum ka Manipur, Arunachal; hynrei, la iohi, ba kim shym la leh stet tasam, ia katei ka mat, kumba leh hapdeng ka Assam, Meghalaya.

Kumta, haba na ki 7 tylli ki jylla jong ka thain shatei lam mihngi, lada 5 tylli kiwei pat, kim shah shkor eiei ruh em, kumta, ka pyni, ba ka jingkren jong u myntri kam poh iing kam don jingmut eiei ruh em, lane lah ban ong ba ka rung pynban ha ki thliew shkor kiba kyllut. Ha kajuh ka phang, ka wan, ruh ka mat, ba lada tang ka Assam bad ka Meghalaya, ki la ia mynjur ban ia pynbeit pud; ka la dei ia U Amit Shah, ba un ai jing iaroh kaba khraw tam, ia ki arngut ki myntri rangbah bad kam dei tang kata, hynrei, ula dei ban pyniaid stet, ba kan long noh, ka ain kaba pura jong ka Ri India; hynrei hangtei ruh, ka shu sdien ha suin, namar katei ka ain, kam shym pat la poi satia ha Parliament, lane ban ioh ia ka jingsoi jong U President ka India.

Kane ka jingleh jong ka sorkar India, ka pynmih ia shibun ki jingmut kiba kahdum ia u paidlang ka jylla Meghalaya bad ka Assam bad kam dei tang katta, hynrei, haba katei ka kylla kaba sdang ruh kam trei kam; ka mih ka jingeh, ban ia bteng, ia ka kylla kaba ar ne kaba lai, namar ba ka la dei sa ka por pynkhreh elekshon, ban jied ia ki MLA thymmai bad ban shu shai beit ka jingiakren, ka la dei ia une u myntri rangbah, ba mynta, ba un sait kti shwa ialade, ia katei ka mat, kaba jyrwit, kat haduh ba kan da wan ka sorkar thymmai ha ka jylla.