IAI BTENG KI JINGSHNA IING BEAIN HA THEM METOR LAITUMKHRAH

Wat hadien bunsien ki jingujor kiba la iaid shaid shaid sha ki bor badei khmih, kito kiba thaw iing beain ha them mator Laitumkhrah ki dang iai bteng ia ka jingtei jong ki bad mynta la nang mih sa ki jingtei bathymmai da kaba pynkhien lut ia ki ain khyndew kiba treikam ha ka jylla.

Ia kane ka mat la sei madan mynshem snem da uwei u nongshong shnong ka thain u Bah Wankitbok Pohshna hynrei ki bor sorkar kiba dei khmih ki la leh kyllut pynban bad ka jingthaw iing beain jong kiba sah hangto ka iai bteng beit da kaba pynkien ia ki kyndon thawiing thawsem ba la buh ryntih da ka tnad pynroi sor. Myn ha u bnai Rymphang jong u snem 2021, u CEO jong ka Shillong Municipal u la pynmih hukum ia kito kiba thaw iing beain ba ki dei ban sahngeh mardor ia ki jingtei jongki ha ka jaka sorkar ia kaba ka tnad MUDA ka la jer iaki kum ki jingtei ba khlem ioh jingbit, hynrei kito kiba thaw ki la leh mynthi pynban bad kila pyndep ia kita ki iing ba ki tei bad la sdang ban shong ban sah syndon da ki briew kiba ym don jingtip satia.

Ha u bnai Rymphang mynta u snem la ujor biang sha ka ophis jong ka bor distrik East Khasi Hills halor ka jingbret niut pathar da kiba sah ha kato ka konpon sorkar sha ka wah thangsniang kaba iasoh lang bad ka wah umkhrah ia kaba baroh ki ialeh ban pynkhuid na ka por sha ka por. Hynrei kat haduh mynta kam shym la don kano kano ka jingshim khia bad ka jingbret niut ka dang iai bteng shaid shi shaid.

La ioh jingtip ruh ba ka don ka jingaiwai iing ia kito ki jingtei ba la shna beain da ki briew kiba sah hangto hi bad ki ju mlien ruh ban pynieng ia ki kali ha ka surokbah ba leit sha thain umpling kaba la pynwit ia ka leit ka wan ki paidbah khamtam ha ka por long skul bad ophis. Ka jingleh bymsuidniew jong ka sorkar ban teh lakam ia ka jingsah bad jingtei beain ia ki iing ha kato ka jaka ka la wanrah ia ka jingbymshong shgain shuh ia ki nongshongshnong ka thain Laitumkhrah bad ki shnong ba marjan. Ka jingkynrei u drok bad ka jingbun ka jingsahah tuh shah thiem ha kito ki jaka ym lah khlem da kynnoh ia ka jingwan buhai shnong jong kibym lah ban ithuh ha kane ka jaka sorkar. Kumta ka la dei por ia ki bor sorkar kum ka bor distrk bad Shillong Municiapl ban tehlakam noh wut wut ia kine ki jingsah beain jong ki briew bym ithuh lem kumta kan nym slem shuh ba ka them mator ha Laitumkhrah kan kylla long kum ka them iewmawlong kaba pynkynduh jingeh ia ka jylla baroh kawei.

(da u nongshong shnong ka Laitumkhrah).