“Hadien ba la khangdam noh ka National green tribunal, ban tih ia u dewiong, ki paidbah kim don pisa satia ban thied wat ia ki dawai ruh”

Shillong: Ka KSU East Jaintia Hills District Unit ha ka 11 tarik u Jylliew 2022, ka la pynlong ia ka jing sumar ei (Free Health Check up) ha ryngkat ka jing ia trei lang bad ka Downtown Hospital Guahati, Assam bad la pynlong ia kane ha Khliehriat West Community hall, naduh ka por 9 baje mynstep haduh ka por 2 baje nohphai sngi.

Ha shwa ban sdang ia kane, la don ka jingialang ba lyngkot kum ka jingpdiang burom iaka kynhun ka Downtown Hospital Guahati. La synran lang ha kane ka step da u Ma Kyrmen Shylla Myntri ka sorkar jylla bad ruh uba dei u nongmihkhmat ka Khliehriat Constituency.

Haba ai jingkren u la pynpaw ka jingsngewnguh iaka kynhun jong ka Downtown Hospital bad ruh iaka KSU East Jaintia Hills District Unit kaba la shim kumne ka sein jam ha ka district, ha kaba u la pynpaw ruh ba hadien ba la khangdam noh ka National green tribunal ban tih ia u dewiong ka la ban jur shisha ia ki paid ka district ha ka kamai kajih bad ha teng ki paidbah kim don pisa satia ban thied wat ia ki dawai ruh. Hynrei u la pynpaw ka jingsngew kmen ba ka KSU bad ka Downtown Hospital ka la shim ia kane ka seinjam bad ai ka jingshakri sha u paidbah ka thaiñ bad ruh u kyntu ia ka seng ba kan dang iai trei shitrhem ha baroh ki liang na bynta ka bha ka miat u paidbah. U la pynpaw ruh ba na ka liang jong u, kum u nongmihkhmat, un iai don ha syndah bad ka seng bad u paidbah ha kino kino ki jingeh.

Ka jingai dawai ka long kaba seisoh ha kaba la sakhi ba la wan kumba haduh lai spah (300) tam ngut ki paidbah kiba kynthup naduh ki khyllung khynnah, ki samla, ki rangbah ki long kmie bad haduh ki tymmen ki kro.

Kum ban shu pynkynmaw ba ka jingai dawai ha kane ka sngi ki kynthup ia ki jingpang kum ka ENT ba dei ia ki bynta ka skhor, khmut, ryngdang bad kumta ter ter, Paediatrics ba dei iaki khyllung khynnah, Gynaecology kiba dei kyrpang ia ki kynthei ha baroh ki rta, Medicine ba dei ki jingpang kyllum, bad ka Oncosurgey kaba dei ia ka bampong (Cancer). Lah ioh ruh ban ai ia ki dawai bapher bapher ha katei ka sngi khlem jingsiew.

Ha kane ka sngi na ka liang ka Downtown Hospital Guahati ka la ai ruh iaki card iakito ki ba lah shim iaki dawai ha kane ka sngi ha kaba ia ki briew kiba ioh ia kine card ki ioh ka jingmap kumba shiphew percent (10 percent discount)haba ki leit sha kane ka hospital ha ki sngi ki snem ban sa wan kiba kynthup iaka jaka sah(Accommodation),ka checkup bad kumta ter ter bad kane ka card ka long ka jingmap lane kata ka discount shi jingim.

Haba kut jong kane ka jingai dawai ei ha kane ka sngi na ka liang ka KSU ka la pynpaw ka jingsngew nguh ba khraw iaka Downtown Hospital Gauhati kaba kloi ban iatrei lang bad ka seng na bynta u paidbah bad ka Khmih lynti ha ki snem ban sa wan yn dang lah shuh shuh ban leh kum kine ki prokram.

Kyntang iawai ka seng ka pynpaw ka jingsngewnguh ia u Ma Kyrmen Shylla uba la don lang ha kane ka sngi ban pynshngaiñ,U Waheh shnong ka Khliehriat West bad kiwei kiwei ki ba don bynta ba pynlong ia kane ka prokram kaba jop.