18tarik Naitung, yn jied ia U President ba thymmai ka Ri India

NEW DELHI: Ka election, ban jied ia U President ka India, kan long ha ka 18tarik Naitung, ong ka kyrwoh, na U Rajiv Kumar, Chief Election Commissioner mynta ka sngi. Ka jingniew ia ki vote, lada donkam, kan long ha ka 21tarik Naitung 2022 bad U President ba thymmai, un bam smai, ha ka 25tarik Naitung

U President Ram Nath Kovind, un kut ka por trei kam jongu, ha ka 24tarik Naitung.

Haduh mynta kam pat don kano kano ka kynhun, kaba la pynbna ia u kyrtong jongka, ban iakhun ia katei ka shuki President, wat la ki lad jingtip, ki iathuh ba U Kovind, un nym ioh lah shuh satia ban iakhun sa shisien ia katei ka elekshon.

U Secretary-General ka Rajya Sabha, un long U Returning Officer bad ka jingniew vote, kan long ha ka 18tarik Naitung bad ka jingniew vote, kan long ha ka 21tarik Naitung 2022.

Ka jingpynbna, na bynta katei ka elekshon, kan long ha ka 15tarik Jylliew, katba ka sngi ba khadduh ban thep kyrteng, kan long ha ka 29tarik Jylliew bad ka jingpeit bniah ia ki kyrteng, kan long ha ka 2tarik Naitung 2022. Ki don 4,809ngut ki MLA, ba kynthup ia 776 ngut ki MP bad 4,033ngut ki MLA, ki ban don bynta ban thep vote.