Shah kem u kpa ba shah kynnoh thmu batbor, ia ka khun ba dang 11 snem

Nongpoh: Uwei u rangbah uba la tip kyrteng kum u Shanbor Rympei, u la shah kem noh ha ki Pulit Ri Bhoi, kata hadien ba u la shah ujor pyrshah ha kiba ha iing, halor ka jingkynnoh ba u donkti ha kaba thmu batbor ia la ka jong ka khun kaba dang 11 snem ka rta.

Katei ka jingjia, kaba la kynnoh ba utei u rangbah u la thmu ban leh ia katei ka kam pap kam sang, ka la jia mynha ka sngi nyngkong mynta ka Taiew, ha kaba kiba haiing tang mar ia tip ia katei ka jingjia, ki la leit ban ujor mar mar sha ki pulit, khnang ba ki pulit kin ioh ban kem bad ba utei u rangbah un ioh ia ka jingshah pynshitom kiba katkum ka ain. Tang mar ia ioh ia ka jingujor, ki Pulit ki la shimkhia halor katei ka jingjia bad hynnin ka sngi Ba-ar, ki la ioh syndon ban leit kem ia utei u rangbah, uba la shah kynnoh ba u la thmu ban batbor ia la ka jong ka khun. Hadien katei ka jingioh ban kem ia utei u rangbah, ki pulit ki la dep ban rejister case bad la pynhap ia u ha ka kyndon ain Protection of Children from Sexual Offences (POSCO) Act.