Sdang buh jingma biang ka surok ha Rngain

Shillong: Ka bynta jong ka surok bah Shillong Dawki, kaba don haneng jong ka kynroh arliang jong ka Rngain, ka la sdang buh jingma biang mynta ka sngi, namar ba ka jinghap khyndew, ka la nang iai bteng, na ka jinghap slap, kaba jur.

Ki lad khubor, ki iathuh ba ki nongtih surok, ha katei ka jaka, ki la sdang ban pyrkhing, ia ka leit ka wan ki kali, ha kaba ki la pyllait kali shiliang shiliang, ban iaid lyngba katei ka jaka, kaba ju twa man ka por, naduh ba sdang kane ka aiom slap.

Katei ka dei ruh ka jaka, kaba ki ar tylli ki kali, ki la shah ban, dang khyndiat taiew mynshwa, na ka jingtuid ka khyndew na ki sharing lum, sha katei ka jaka, kaba pynheh surok.