Hato ki Pastor/Thiolojian ki long ban rung ha ka Politics ?

Editor,

Nga la ioh pule ia katei ka Jingkylli maitphang ba la thoh da u Banpyrkhat Nongrang na ka shnong Mawlaiteng (Jan Lumdiengiei). Kane Ka jingthoh ban pynpyrkhat, ka la mih ha Mawphor, U Nongsain Hima, Rupang bad hajan baroh ki Kotkhubor Khasi. U nongthoh u la dep jubab hi ia katei ka Jingkylli wat la u la shim por shibun ban pynwandur. Nga te nga jubab mar mar, ka long kein, lada u ta u Pastor/Thiolojian u don ka jingangnud bad ka thong kaba sngur bad kaba shisha ym kaba asap. Tangba, uta/kita ki dei ban iehnoh shuwa ia ka kam Pastor /Phadar
khnang ban ym don ka jingkhleh jaktung.

Nalorkata, lada u Pastor u la shah saindur janai bha ialade ha ka longbriew manbriew bad ha ka kam bakyntang ryngkat ka jingriewblei bad jingtip bajylliew ia ka Ktien U Blei ka bha eh ba un rung ha ka politiks ban iarap pynkhuid ia ka na shapoh katba u lah. Kaba donkam eh ha kane ka juk khamtam ka long, ban pynrung ia U Blei ha ka Politiks ba Un pynkhuid ia ka jaboh jong ka, namar ka la jakhlia palat, bad ba ki briew jong U Blei kum ki Pastor/ki Phadar kin leh ia kata, ym ban pynjngut shuh shuh. Shaphang ka Jingkynnoh ba ka politiks ka long kaba jakhlia bad ym dei ban pyniakhleh bad ka niam.

Mano ba ong Kumta? Ka politiks kam long Kumta. Ka dei ka kam Kyntang, ka dei ka kam ban shakri ia ki paidbah bad ia ka Ri. Dei ki briew, ki pilitishian, ki minister kiba pynjakhlia ia ka. Ki don ruh Katto Katne ki pilitishian bad ki riewniam kiba kynshoit kumta ban Khang ia ki pastor, ki nongialam niam ban ym iakyrsum bad ka politiks hynrei ialade pat ki iakynduh bad ialuh sop sop bad iasboh bha bad ki pilitishian ban shim kabu ban ioh jingmyntoi shimet lane ka iing ka sem ne wat ia ka balang kajong ruh. Hynrei, ia kiwei te ym long ne ym bit. Ha kaba iadei bad kane ka bynta nga wallam ha phi ki Nongpule ia ka jingkren kine ki riewkhraw bad riew shemphang harum:
U Mahatma Gandhi u la ong, “Uno uno u ba ong ba ka niam kam don jingiadei ei ei bad ka politiks um sngewthuh ei ei ruh ia ka jingmut jong ka niam”. Katba u Bishop Desmond Tutu jong ka Republic of South Africa u la ong, ” Nga shaiong ngain ka Bible aiu kata ba ki briew ki pule ka ba ong ba ka niam kam iakhleh (kam don jingiadei) bad ka politiks”. Wallam ia U Blei ha ka politiks. Buh ia U hapdeng duh. Ma U un sa pynkhuid ia ka.

Khublei.

U Bah Philip Marwein,
Nongthohkhubor,
Jaiaw, Shillong-2.