Ki pulit dkhar, sha ki nongkyndong

Halor ka jingshah pyniap jong ki arngut ki hep rit shi para, ha Nongrah; ka la mih ka jing bitar jong ki iing ki sem bad ki kur ki jait, jong kitei ki khynnah rit, ia ki pulit kiba don ha katei ka jaka.

Haba sngap, na ka jingkren jong kiba ha iing, la sngew, kumba ki jingkren, ki long kiba dei suda bad kawei na ki mat, kaba ka tnat pulit, ka hap ban lehnoh, ka long ban weng kam ia kitei ki pulit, kiba don ha katei ka miet bad ki bym shym la iarap eiei ruh em ia katei ka longiing, da kaba ki ai daw, ba katei ka thanat, ka la khang, naduh ka por 8baje mynmiet.

Kawei kaba pyn pyrkhat, ka long ruh, ba balei sha, ki da bun tasam ki pulit dkhar, ha kine ki sngi, ha kane ka jylla jongngi; tip naei ki ioh kam bad la ka trei kam pura ne em, ka bhah kam 10 percent, na ka bynta jongki bad kam dei tang katta, ka wan sa ka mat, ba ha kano ka dur, ba katei ka tnat, ka phah ia kitei ki dkhar, ba kin leit sha ki nongkyndong, ha kaba ki la tip lypa, ba ki nongkyndong, kim nang ban kren dkhar ne kren phareng bad sa kitei ki pulit ruh, kim nang satia ban kren ia ka ktien shnong jong katei ka thain. Ka jingduh ia kitei ki ar ki mynsiem briew, ka la long ka jingjia kaba sngewsih tam bad ka jingjia kaba pynjah burom, ia ka nam tip briew tip blei jong ka Ri Khasi Jaintia bad kaba kongsan eh, ka long ba ka kashari, ka dei ban tian bishar mardor bad nangta ba ki pulit, kiba tohkit, ki dei ban pynstet mar mar ia ka kam jongki bad ha kajuh ka por, ba kito kiba leh sting, ia la ka jong ka kam, ha katei ka miet 3tarik Jylliew, ki dei ban ngat ha ka jingshah pyn shitom, ha ka tnat pulit.

Lyngba kane ka jingjia, ka la dei hi ruh ia ka sorkar jylla, ba kan rai kyrkieh, ba kam bit ban phah ia ki dkhar sha ki nongkyndong bad katei ka kyndon, ka dei ban long ia ki Bank, ki tnat telephone bad ia ki ophis sorkar India ruh, namar ba haba kim ia sngewthuh ka ktien ka thylliej, kumta, ki shu leit ban shong aram sha kitei ki shnong, namar ba ki paidbah, kim donkam satia ban iakren ia ki. Kam kut tang katta, ka wan biang ka mat, ba ka la dei ban pyntrei kam pura, ia ka ain jong ka sorkar jylla, ha kaba ki ophis ha ki District, ha ki Civil Sub Division lane ha ki nongkyndong, ki dei ban thoh bad kren da ka ktien Khasi, ha baroh ki jing donkam.