Ki la mih ki jing pyntip ba khyllah, ha kine ki sngi, halor ka jinglong jingman jong u aadhar number bad wat ka sorkar India, ka don ka jing bym thikna, halor utei u number, ha kaba shisngi, ka kren artatien ia utei u number bad sa shisngi pat ka kylla ktien noh, da kumwei pat.
Ym tang katta, wat ki pulit ka jylla ruh, ha ki khyndiat sngi ba ladep, ki la sei ia katei kajuh ka nia, da kaba ki pynsyier mynsiem, ia ki briew, ba kin ai ia kitei ki number aadhar sha kiwei. Kane ka jing pyntip, da ki tnat sorkar, halor u aadhar number, ka buh ia ka jingeh kaba khraw, ia ki lak ngut, kiba la dep shondur ia u aadhar, ha kane ka jylla lane sa kiwei pat ki klur ngut, kiba la pyn donkam ia utei u number ha ka Ri India hi baroh kawei.
Kam dei tang katta, kane ka sorkar BJP, kaba la lushia than, ia ka kam shimet jong u briew, ka dei ban bah khlieh, lada ka jia kano kano ka jingma, ia ka pisa pilain jong u briew, kaba ula pynlang shitom hapoh Bank. Kane ka sorkar, ka la thaw ia ki ain teh kyndon kiba har rukom, ha kaba ia ka pisa jong u briew shimet, ki pynkylla pisa sorkar tang sha poi ha Bank, ha kaba ka Bank, ha ka jaka, ba kan sngewnguh ia u nongbuh pisa, hynrei ka nion, da ki ain bapher bapher, ki bym lah shuh ban ia niewtang hangne.
Ka jing pyniasnoh ia u mobile number bad u aadhar ruh, ka dei ha kane hi ka buit jong ka BJP, ka pyniasnoh ia u account number bad u aadhar ruh, ka dei hi ha kane ka sorkar, ka pyn iasnoh ia u khaw reshon, ia ka skhim iing baduk bad sa kaei pat, kaba dang sah, haba u aadhar, ula kylla long u number uba donkam naphang. Ka jingwan jong kane ka sorkar BJP, ha u snem 2014, ka dei halor ka nongrim jong ka jing bamsap tasam ka sorkar Congress, ha kaba ki kynnoh ia ka bamtuh, kaba don ha swiss bank bad ba U Modi, u kular ia ka T.15 hajar ia uwei pa uwei u nong India bad ka dei halor katei ka nongrim, ba la pynduh pisa mar mar ha u snem 2016 ban set sbak, ia ka pisa tuh, kaba don ha iing ka Sonia bad nangta la thaw sa shibun ki kyndon kiba tyngeh; hynrei kat haduh ha kine ki sngi, kitei ki ain, kim don soh eiei ruh em bad la shu iohi, ia ki klur ngut kiba plie account khlem pisa (zero balance), nangta sa ki nongkyrshan ka BJP, kiba la kylla long ki heh spah duh ha Asia, katba ka Sonia, lane U Rahul; tang shi minit ruh kim pat shong phatok.
Phi don ban ong eiei?