Ka President Rule ba-ma

B.M. Lanong

Ha kine khyndiat sngi, la mih katei ka mat haneng, “Ka Jingshimti ia ka Sorkar da u President ka Ri”, lada jia ba kyllon kino-kino ki Sorkar jylla ha ri India, hapoh ki Article 356,357 ter-ter jong ka Riti Synshar ka ri India; kata ka President Rule.

Ki riew paidbah babun kin shitom ban sngewthuh bha, haba da ki Minister bad ki MP bad ki MLA ruh, ki don kibym da sngewthuh bha ia kane ka bynta. Don pat kiba sngewthuh, hynrei ki kynshoit da ki rukom sianti shimet jong ki.

Ka la mih katei ka jingiakren dang shen, haba ki press-media ki kylli bad ki thoh halor ka jingbym mih noh da ki Seng ne ki party kiba iadon bynta ha ka Sorkar MDA jong u Chief Minister Conrad Sangma, haba kim don ka jingiabeit ne jinghun ia ki jingpyniaid ka Sorkar, khamtam eh halor ki mat jong u pud u sam bad ki kam khalai, kata ka Casino bad kiwei-kiwei de.
Ka long kaba suk ia kito kibym sngewthuh bha ban kylli “balei phim iamih noh, haba phim hun? Balei phi shu dait bad byrngem lymwir, haba phi iatrei lang? habym hun te mih noh, kamat wan kata ka synshar President na Delhi, kan pher aiu bad kum kine ki jingiakren”.

Ngi la pyrshang ban pynsngewthuh, ba ngi sheptieng shisha, ba lada kyllon noh kane ka Sorkar MDA, kan wan shisha ka jingshimti da ka Sorkar na Delhi hapoh kitei ki kyndon haneng, ia kaba u Lat ka jylla un peit bad un pyniaid na ka bynta u President bad ka Sorkar India, tad haduh ban da wan da kawei pat ka Sorkar thymmai kaba biang briew, ban shimti ia ka synshar-khadar.
Ba lada ka Sorkar India na Delhi kam ihun ia kano-kano ka kynhun kaba kam bad kwah ban shimti ia ka jingsynshar, ka lah ban pynjlan ter-shi-ter ia kata ka President Rule, ne synshar da u Lat na ka bynta u President, katba ka mon.

La jia ha kylleng ka Ri India kum kine ki President Rule ha ki por ba la leit, ha Meghalaya ruh, khamtam sha ki jylla baheh ka ri India, kum ha UP, Maharashtra, Bihar ter-ter da bun-bun snem. Ha UP lei, ki Synshar President babun tam, kumba 10 sien ki la jia.
Kiei Ki Jingma?
Habym don ka Sorkar lajong, na la kajong ka jylla bad ki nongialam lajong na ka jylla lajong, hato don jingshngain hi?
Ha kane lei ka por kaba mynta, kaba ka Sorkar India ka kwah ban pynrung ia ka rel lyngba ka Sor Shillong shaduh Jaintia bad ter-ter shaba kut ka Mizoram, yn iakren aiu shuh ia ka jingrung ki mynder ri? Ka jingma na kato ka ain SVAMITVA lei, ban thew khyndew aiu tip, kaba da ki hajar-hajar ki mynder kiban wan rung shapoh ki shnong ki thaw kylleng, ba shong haduh 15-16 snem? Hato kam mut ban phah ’si kpa ban pynjah syndon ia kine ki shikham-arkham ki paid riewlum shim jait kmie, kiba long trai khyndew ruh, ym kumba long trai da ka Sorkar shawei-shawei?
Ki seng bhalang kiba pan ILP, ki ioh pynban da kitei ki jingtyrwa. Shu buh ki ai ia kata ka ILP, ki seng bhalang kin ailad ban wan ka Rel? Don jingiadei aiu ka Rel bad ka ILP?

Lada wan ka President Rule kitei baroh kin wan rung lut, nalor kiwei-kiwei.
Peit kai ha thain 9 Lad ter-ter shaduh Motphran, ki surok ki la khim lut ba tur ki nongwei shet pakawri bad ki papor pum-pum ha kajuh ka umphniang sah taiew, ba la khleh syep-eitmut.
Ki juti jot, ki jain bad ki nep rim ba la phong ki nongpang bad nongiap na kylleng ka ri India, la wan phriang khapngiah ha ki lynti synkien. Ki daju ki mator ki la long trai bad leh heh lut,
Ka jingkhapngiah kali, jingjynjar ki nongleit-nongwan kabym tip shuh. Shano ka Sorkar ka don, nga kylli biang, wat la ngi iadon lang?
Ha kiwei ki Sorkar ba la leit noh, kim ju iakylli, iania, iamai, iapyni jingmut?
Ki pra balei kiwei ki Sorkar. Shano ka Congress kaba la synshar kumba 50 snem? Ha ki lei, ki jingiaknieh, jingiaidait kiba lynter tait, haduh ba kin da pra pom. Ki nud pat ban kylli, balei ki seng hapoh ka MDA ki lapmiet ka kdew kti?

Ka Bynta Ki Press
Ki kot khubor ki long kiba donkam ha ka imlang-sahlang, khamtam ha ki kam synshar-khadar bad ha bun ki bynta. Bun ruh kiba shakri hok ia la ka bynta, kaba pynmyntoi shisha ia ki paidbah ban tip ia ki jingshisha bad ki jingjia babun.
Kaba nga kyndit eh ka long ha ka kot khubor Phareng ‘Shilong Times’ kaba ktik man ka por, bad mynta lei ka la kynto shnong syndon da i Kong Editor, “Ngi kwah President Rule, wan-wan kloi ko synshar President,”…Wow!
Nga pat nga la pynshai, ba wat hapdeng ki jingiapher jingmut jong ngi, hapoh ka MDA, “ngin dang lah hi ka Sorkar u Conrad Sangma bad i Bah Prestone” ban ia ka synshar President na Delhi, ba kwah palat i Kong Editor.”