Imat ka sorkar, ka kwah ba ngin iakhih ban pyllait kaiphod, ong ka Sur ka Bri U Hynniewtrep, halor ka kaiphod shah siat U bah Che

Shillong:Ka Sur Ka Bri U Hynñiewtrep kaba dei ka kynhun ki sengbhalang bad ki kynhun bapher bapher ban dawa na ka sorkar ban ai ïa ka jingbishar kaba hok, halor ka jingshah siat ïap u nongïalam barim ka HNLC u Bah Cheristerfield Thangkhiew, ha ka 13 Nailar 2021 ha ka ïing sah jong u ha Mawlai Kynton masar mynta ka sngi ki la pynlong ïa ka jingïakynduh lang ha ïing jong u Bah Che.

Haba kren sha ki lad pathai khubor u Bah Donboklang Khar lyngdoh u Chairman jong kane ka kynhun, u la ïathuh ba kumba naduh ba sdang hi ba ka kynhun ka dawa ban ai ka jingbishar kaba hok ïa u Bah Cheristerfield Thangkhiew bad ban pynshitom ïa kiba donkti ban siat ïap ïa u ka kynhun ka dang ïeng ha kane ka nongrim haduh kat mynta ruh.

U Bah Donboklang u la takraiñ tyngeh ïa ka sorkar jylla namar ka jingbym pyllait paidbah noh ïa ka kaiphot jong ka kynhun tohkit ba la khlieh da u Justice T Vaiphei wat hadien ba ka kynhun tohkit ka la aiti ïa ka kaiphot naduh ka 20 tarik Jymmang sha u MR. Shuh shuh u la ong, ba kumba ka sorkar ka la pan por ban shim sienjam kumba ki la dawa halor ki pulit kiba la leit siat ka sorkar ka dei ban leh noh mynta u la ong. Haba ïadei bad ka jingkam u MR ba ka sorkar ka la aiti sa ka jingpeit bniah ka tnad political department na ka liang u Bah Donbok u la ong ba kane ka jingleh jong ka sorkar ka long ban pynjah lehse ïa ki sakhi satar khnang ban ïada ïa kito kiba donkti u la ong. Balei donkam ban da pule ka tnad political department haba dei ka kynhun tohkit u uba la lut Ïa ki jingdonkam buh jingkylli u Bah Donbok. “Ïa u Bah Che la wan siat ïap da ki pulit da ka jingtip u Myntri ki kam poh ïing bad u Myntri Rangbah ka jylla na kata ka daw u Conrad u dei u Boss gang jong ka kynhun MDA” ong u Bah Donboklang Kharlyngdoh.

Haba ïadei bad ka jingwan ïuhkjat kaba khah khah u MR sha Mawlai na ka liang u Bah Donbok, u la ong ba kane ka jingleh jong u MR ka long lehse ban pynbieit ïa ki nong Mawlai, hadien ba u la leh ïa ki kam kiba long pyrshah ïa uwei na ki nongshong shnong kane ka shnong. Shuh shuh u Bah Donbok u la ong ba ka jingkloi ban klet biej kum ka jaidbynriew ngi la shah shim kabu u la ong. “Ngi ïakhih ban thung kynhun tohkit laitluid, imat ka sorkar ka kwah ba ngin ïakhih sa ba kan pynlait paidbah” ong u Bah Donbok.

Haba bynrap lang ïa kane, na ka liang ka Kong Patricia Sawian, ka la ong ba kum ki longkmie ka shnong, ka kloi ban kyrshan lang ïa kino kino kiba ka kynhun kan shim. Shuh shuh ka la kynthah ïa ka jingbym pynlait shuh ïa ka kaiphot da kaba kynthah ïa ka jingkam u MR ba ka kaiphot ka khia 50 kilo. “Lada u MR um lah pule shuh ïa kata ka kaiphot khot ngin ïarap pule lem ngi kloi ban iarap ïa u” ong kane ka longkmie.