Ki Israel bad u Jisu Khrist

AIS SUJA

Ka don ka jingiadei ba khrawtam hapdeng ki Israel bad u Jisu Khrist, kat kum ka ktien u Blei. Haba ym pat kha ia u Jisu Khrist, kat kum ka ktien u Blei, da ki Prophet kum u Isaiah da kaba ong – Namar kata u Trai hi un ai dak ia phi; ha khmih ka theisotti kanpunkhun kan kha ruh u khun, yn khot ruh ia ka kyrteng jong u Immanuel. Isaiah 7:14. U Prophet uba khadduh udei u Malakhi. Hadien kane ymdon Prophet shuh uban iathuhlypa namar la wan ka por jingsngap jar noh jong u Blei kumba 400 snem eiei (Four hundreds Silence years). Hadien ki 400 snem ki por jingsngap jar, uta u KTIEN jong u Blei u la long doh long snam kaba mut u la wan ban long briew sha kane ka pyrthei. “U TA U KTIEN U LA KYNJA DOH (The Word became flesh)” Ioanis 1:14. U Ne u KTIEN u dei u Blei bad u dei u Jisu une u ladon naduh mynnyngkong bad u Blei. Ioanis 1:2. U ne u Ktien u la shong sah bad ki briew ha Israel. Ioanis 1:14 pynban kim ithuh ia u…. ka Pyrthei kam shym la ithuh ia u bad kin pdiang ruh ia u. Ioanis 1:10-11.

Te haba ki Israel kim pdiang ne ithuh ba u Jisu udei u Blei ne u khun u Blei ne uta u Messiah jong ki, U Jisu u la phai noh sha samaria. Ha ka nongsamaria, ka la ong – To ale to khmih ia u briew uba la iathuh ha nga ia kiei kiei baroh kat kiba nga la leh: une u long shisha ne em u ta u Khrist?… ki paidbah samaria ki ia ong – Mynta ngi ngeit, ym namar kata ka jingong jong pha shuh, hynrei naba ngi iatip ba une u long shisha u Khrist u Nongpynim jong ka Pyrthei…. Ioanis 4:29-42.

Ki nongsamaria te ki ithuh ba u Jisu udei uta u ktien, u khun jong u Blei, U Messaiah jong ki Israel, u Nongpynim jong ka pyrthei. Katba ki Jiw ne Israel kim shym la ngeit ha U Jisu haduh kine ki sngi. Na kata kadaw u Jisu u ong ba iakane ka Gospel jong ka Hima (Ki bneng) yn ialap ha ka pyrthei baroh, ia kaban long ka jingphla ha ki kynja bynriew baroh. Mathaios 24:14. Kan long ka jingphla ka jingiathuh sha ka pyrthei baroh ba u Jisu u dei u Trai. Kumta ia ka Gospel ka hima u Blei la ialap kylleng da kaba sdang na Samaria, Judia bad Jerusalem bad sha kaba kut ka Pyrthei. Ki Kam ki Apostol 1:8.

Hynrei kaei pat kaba jia ha Israel? Ba ia ka kyrteng Jisu ym shym lapdiang hapdeng jong ki haduh kine ki sngi namar kim ngeit kim ithuh udei uei? U Jisu u pynithuh ialade ba udei uta uba wan nabneng, pynban ki Jiw (Israel) ki ia kren khnium shaphang jong u na ba u la ong – Nga long uta u kpu uba la wan hiar na bneng ki la kylli te, ymdei une uta u Jisu u khun u Joseph? Ia u kpa bad ia ka kmie jong u ngi ithuh. Hato kumno te ba u ong une, Nga lawan hiar na bneng? Ioanis 6:41-42. Don pat kiba kylli, une u dei uta u Messiah? Hynrei ki ia ong pat – Ia une ngi ia ithuh nangno u long; hynrei ynda wan uta u Khrist, ymdon batip nangno u long. Te u Jisu u la kylli ia ki Jiw – “Phi ithuh te Ia nga? Bad phi tip ruh nangno nga long? Ioanis 7:25-27. Ki Jiw ki mut beit tang ha kadoh, ba u Jisu udei tang u briew u khun U Joseph bad ka Mari. Kumta kim ngeit ba udei uta u Messiah wat lada u Jisu pynithuh katno katno ruh haki. Ki Jiw ne Israel kidei ka jaid bynriew ba eh ryndang. Exodus 32:9-10.

Kumta la pyndep ia ka jingong U Isaiah – “Ia kaban ioh sngew phi iohsngew, te phin ym sngewthuhshuh. Bad ia kaba iohi phin iohi te phin ym shemphang naba ka dohnud u rben bad sngewkhia da la ki shkor bad ki khaprip ia la ki khmat…. Hynrei suk ki khmat kiba iohi bad ki shkor jong phi ba ki iohsngew! Naba shisha Nga ong haphi, ba bun ki Nongiathuhlypa bad ki riewhok ki la kwah ban iohi ia kine kiei kiei ruh baphi iohi, te kim shym la iohi bad ban iohsngew ia kiei kiei ruh baphi iohsngew, te kim shym la ioh sngew.. Mathaios 13:14-17.

Ki Israel (Jiw) ki iohi bad iohsngew dalade hi hynrei kim ngeit. Ki long shisha kiba eh ryndang. Dei na kata kadaw ki poi sha ka jing jot. Ha u Prophet Hosia la ong – “Ia u paid lang jong nga la pynjot namar bymdon jingtip”. Hosia 4:6. Kumta ki Jiw ne Israel ki shu jot ei namar kim mon ban pdiang ia ka jingshisha ka jingtip ia ka ktien jong u Blei, bad kim mon ruh ban pdiang ia u Jisu ba u long uta u Messiah ne u Khrist u Nongpynim jong ka Pyrthei haduh mynta mynne. Kamlong kaba suk ia ki nong Israel ban ngeit ha kata ka kyrteng Jisu namar kim ngeit haduh mynta hynrei tang katto katne ki ngeit. Lada kylli ha ki Jiw Uei u Jisu haphi? Who is Jesus to you? Kin jubab dakaba ong, Udei u Prophet, udei u Nonghikai, la kha ia u na ka jaid Jiw, don pat kiba ong Ngim tip hynrei tang katto katne kin ong ba u dei u Messiah, hapdeng ka jingartatien kata ruh.

U Jisu u la ong shaphang ki Israel kumne: “Naba shisha Nga ong haphi, baphin ympat lah pyndep ia ki Shnong ki Israel, tadynda unwan u khun u Briew. Mathaios 10:23. Ka mut ba ki Israel kin ym ngeit wat lada la ialap ha ki katno katno ruh shaphang u Jisu, ym lah ban pynngeit ha ki ba udei uta u Messiah jong ki tad ynda u Jisu un wan dalade hi ban paw ha ki ha Israel. La ialap ia ka Gospel u Jisu Khrist ha kylleng ka Pyrthei bad lajan dep artad, hynrei katba ha Israel ymlah ban pyndep ban ialap ia ka Gospel u Jisu Khrist tad ynda kim iohi da lade hi ba un wan. Kaei kaba jia? Namar ba ki Israel kim ngeit, U Blei un satheh noh buk halor ka ing u David (Israel) halor ki nongjerusalem ka mynsiem jingaiei bad jingkyrpad: ha kata ka por kim iohi kim khmih ia u Jisu uba ki la sum, kin iam briew ia u kumba uno uno u iam briew ia la u khun marwei, bad kin sngewkthang namar jong u, kumba uno uno u sngewkthang namar uba la kha nyngkong jong u. Ha kata ka sngi ka long ka jingiam briew bakhraw ha Jerusalem. Sekharaiah 12:10-11. Kane kamut ba ki Israel kin sa tip ba u Jisu u dei pleng u Messiah jong ki bad u syiem jong ki ia uba ki la kyntait da ki hajar hajar ki snem. Kin sngewsynei ia u ba ki la kyntait bein ia u. kin iam paiddohnud namar jong u ha kata ka sngi, ong ka ktien u Blei. Kin sa iohi bad ka pyrthei baroh kan iohi ba u Jisu un wan un hiar halor u lum Olive hajan Jerusalem. Sekharius 14:4. ‘’

Namar kata, “Suk uta uba pule bad kita kiba iohsngew ia ki ktien jong kane ka jingiathuhlypa bad kiba sumar ia kiei kiei ruh ia kiba lathoh haka: namar , KATA KAIA KA LA JAN. Jingpynpaw 1:3.