Ki don shibun kiba dawa, ban pynrung ia ka ktien Khasi, ha ka khyrnit kaba phra; hynrei ka burom, ka dei ban leit sha ki nong thoh kotkhubor bad khamtam ki video channel, kiba la lah ban pynbor ia ki heh sorkar bad wat ia U Conrad Sangma, myntri rangbah ka jylla, ba un kren khasi tyngkhat.
Lah hi ruh ban ong, ba kiba pyndonkam bun eh, ia ka ktien Khasi, ki dei ki nongthoh khubor, lada dei ki print lane ki video ruh kumjuh bad kano kano ka ktien kaba ki kren bad pyndonkam ma ki, ka la kylla long ka ktien Khasi. Ki heh sorkar, ki kwah ba ka jingkren jongki, kan poi sha u paid ba iar jong ka jylla bad dei na kata ka daw, ba naduh ka por jong ka khlam corona, la iohi, ba ki doktor ki ju kren Khasi, ha ki jing iakren bad ki kotkhubor, ki myntri sorkar bad ki sengbhalang ruh kumjuh, ki ju kren da ka ktien kmie, lane ka ktien kaba ia sngewthuh uba bun balang.
Kumba la ong haneng, ka burom, ka leit sha ki nongthoh khubor, kiba la nang ia bun bad ia ieid ia katei ka kam bad kaba la pynlong ia ki heh sorkar, ba kin nang pyndonkam ia katei ka ktien bad kaba dei ruh kawei na ki mat, kaba la ju dawa da ki nongthoh Khasi jong ka jylla bad lah ruh ban ong, ba lada la iakren hi da baroh ia ka ktien Khasi, kumta, kan sa ialam lynti, ba kan nang rung sha ki skul bad ki kolej ruh bad kam da donkam than, ban ia ap ia kata ka khyrnit kaba phra ne kaba khyndai, namar ba u paidlang ka jylla, ula pyndonkam hi dalade.
Ha kajuh ka por, ka dei ruh ia ka seng ki nongthoh lane ka Khasi Authors Society (KAS), ba kan pynbor ia ka jing pyndonkam ia ka ktien Khasi ha ki Civil Sub Division lane ki District, kum ka Associate Official language, ha kaba ka sorkar jylla, ka la bthah (la slem bha) ba ha kitei ki ophis rit, ban pyndonkam da ka ktien Khasi, kum ka ktien thoh; hynrei kaba lyngngoh, ka long, ba ha Secreteriat, ki iakren Khasi shait shait, katba ha kine ki ophis rit jong ki Block, ki Sub Division bad ki District, ba ki thoh shithi sha u bym nangthoh da ka phareng. Ka KAS, ka la dei ruh ban dawa ia ka sorkar, ba kan thung da ki briew kiba nang ban kren Khasi, haba ki leit trei sha ki jaka kyndong, ban nym thut ki jingtrei ka sorkar pdeng ne ka sorkar Jylla.
Ha ka jylla jong ngi, ngi dang duna palat ki lad ai jinghikai ktien khasi ne ktien jylla, kumta donkam ban pyndonkam bun ki lad na ka bynta ban riewspah ia ki ktien tynrai khnangba ngin nym bakla, ki chenel media ki ba don ha shillong, kim poi shuh sha kyndong kynshroit jong ka jylla. kumta information technology dei ban kover ia baroh ym dei tang ha ha sor.