Leit pyniasoh HSPDP u hehspah, lah ban mih madan na Umsning

Nongpoh: Mynhynnin ka sngi ki nongkitkam ba hakhmat ka Hill State People’s Democratic Party (HSPDP) Umsning Constituency ha ryngkat ki katto katne ki nongkitkam ka Ri Bhoi, ha ryngkat u bah Premson Makdoh, uba dei uwei na ki hehspah, ki la leit ban kynduh ia KP Pangiang, kata na ka bynta ban pynkhlain ia ka Party hapoh ka Distrik bad khamtam eh na bynta ka Umsning Constituency, ha kane ka Ilekshon 2023.

Ha katei ka sngi kaba ki la leit ban kynduh ia utei u nongialam ba hakhlieh eh ka HSPDP, nalor u bah Premson Makdoh, la synrang da ki nongkitkam ka HSPDP Umsning, kiba kynthup ia u bah Teiborlang Marbaniang, President, u bah Balumlang Nongbri Secretary, u bah Khrawpyrkhat Marwein, General Secretary ka HSPDP, Ri Bhoi lem bad kiwei. Haba pyrshang ban kylli na uwei na ki heh nongialam ka HSPDP Ri Bhoi, la u bah Premson Makdoh un iakhun ne em na Umsning, utei u nongialam ka HSPDP, um pat lah ban ai jubab, hynrei u la pynpaw ba shen ka Party kan sa pynbna paidbah, namar ba ki kwah ba uno uno u kyrtong uba ki pynieng ba un poi sha ka thong ka jingjop, hynrei watla katta la sngewthuh pat ba u bah Premson Makdoh un sa long kum u kyrtong ka HSPDP na Umsning Constituency.

Katei ka jingleit kynduh bah KP Pangniang da kitei ki nongialam ka HSPDP ha Ri Bhoi, ka long, ban iakren halor ki kam ka Party bad ba kumno ban nangpynkhlain shuh shuh ia ka Party hapoh ka Distrik bad ha manla ki Konstitwensi kiba don ha Ri Bhoi.