U BABU JEEBON ROY MAIROM, U KPA KA JAIDBYNRIEW KHASI

Delina Khongdup

Ka 16 tarik u bnai Jymmang, ka dei ka sngi, ka ba uwei pa uwei u Khasi ba ieid bad burom ia la ka jinglong Khasi, ia la ka thymmei, ka saiñ pyrkhat, ka culture bad ka nongrim lajong, un dap da ka jingsngewnguh bad ka jingsngewsarong ia u wei na ki riewkhraw ka Mei Ri Khasi bad ka mei Ri Bharat hi baroh kawei, u ba ia ngi iwei pa iwei lah pyrshang ban pynklet bad pynjah syndon ia ka nam ba khraw jong u. U dei u unsung Hero jong ka jaidbynriew Khasi jong ngi. Kane ka sngi ka dei ka sngi lyngkhuh sngi iap ba 119 snem jong u riewkhraw pyrkhat, riew ieid ri ieid Jaidbynriew bad u riewshemphang u ba lah ban pyniaryngkatdor bad u Lok Manya Tilak, u Mahatma Gandhi bad kiwei de ki riewkhraw ka Ri India, u ta u dei U Babu Jeebon Roy Mairom,u ba la ieh khunswet ia ka ri jongngi ha ka 16 tarik u Bnai Jymmang 1903.
Ia une u riewkhraw la tip bad ñiew kum uwei na ki riewshemphang jong ka ri Khasi da baroh ki Dkhar bad ki Phareng katba kaba sngewsih ka long, ba napdeng jongngi ki Khasi pat tang kumba 20% ei ei ki briew kiba tip bad iohsngew ia ka nam une u riewkhraw. Kumta, ngam lah khlem da thoh khyndiat khynsoit shaphang jong I Babu Jeebon Roy khnang ba ka pateng jongngi kan nym sah dum halor ki kam ba khraw jong une u Rangbah. Baroh ngi tip ba ia u Thomas Jones la tip kum ‘u kpa ki Dak Khasi’ u JJM Nichol Roy kum u kpa ka District Council, ter ter….kat ba ia u kpa ka jaidbynriew Khasi lajong pat ngim tip, imat ba um don ia ka kyrteng ba kham pher!.

La kha ia I Jeebon Roy Mairom hashnong Saitsohpen-Sohra ha u snem 1838 (hadien ka jingkhlad noh I Paiem Tirot Sing Syiem). Ka kmie jong I ka dei ka Bijan Laitkynsew Jiat Mairom bad u kpa jong I u dei u Ram Singh Korkata, Jait Rani. I Jeebon roy, I don lai ngut shi para bad I dei I khun phrangsngi jong ki kmie ki kpa jong I, ha ka jinglong khynnah jong I, I khlem ioh ban leit shongskul namar ha kata ka por ym pat don skul hapoh ri Khasi jongngi, pynban I long u khynnah u ba smat ba sting, ba proh jabieng, ba pnah ka ktien ka thylliej kumjuh ha ki kam baroh. Shuh shuh I dei na ka longing kaba heh ka khaiï ka pateng bad ki ba na ri thor, kumta I iohlad ban ia kren ia kynduh bad ki briew kiba na rithor bad kumjuh ki phareng ruh.

Nalor ba I lah long lypa I khynnah ba don sap bad haba I iohlad I ju leit bud sha hat bad la I meikha bad ki kmie ki kpa sha kylleng ka ri dkhar, I lah ban thoh bad kren ia ki bun tylli ki jait ktien naduh ka ktien Phareng, Hindi, Odiya, Assamese, Sanskrit, Bangla etc………. Ha ka rta kaba 20 snem ei ei I la ioh kam sorkar bad long kum u nongpynsngewthuh ktien hapdeng ki Phareng bad ki Khasi, Khar Bangalee bad ki Khasi, kumta ter ter….. bad I long I ba tbit haduh katta katta. I la bat bun tylli ki kyrdan ha ka kam sorkar jong I, kum u Jailor, A.E.C bad kiwei kiwei de. I long u briew u ba dap main shynrang bad I shongkhia bad shongkun shisha.
Ki kam ba khraw kiba I babu Jeebon Roy I lah leh na ka bynta ka ri bad jaidbynriew Khasi ka long shisha kaba ma ngi baroh mynta ngi dei ban sngewnguh bad brurom shi katdei eh.

Mynta haba ngi leit ngi wan ngi leit da ki kali, ngi ioh jingshai na ka bording hato ngi ju pyrkhat uei u ba wanrah nyngkong eh shangi? Dei I Babu Jeebon Roy ba hikai nyngkong eh ban pyndonkam da ki kali kulai bad kali masi bad pynsuk ia ka kit ka bah khamtam ia ki mar pohkhyndew kum u Mawshun, dewiong etc.. ha kato kapor dei tang ma I ba lah ban ia shan bad ki bor sorkar Phareng ha ka tih Mawshun bad Dewiong.

Haba ngi dih Coffee, ngi dei ban da kynmaw ba dei I Babu Jeebon Roy ba wanrah symbai nyngkong eh bad hikai ruh ban thung ia u coffee sha ki thaiñ Mynteng.

U Sohphoh uba ngi ju bam pyngngad ruh u dei ba wan rah symbai I babu Jeebon Roy.

Ia u symbai phan ki ong dei u David Scott ba wanrah symbai nyngkong eh, hynrei dei I Babu Jeebon Roy I ba la hikai ban thung na ka bynta ban die bad thawlad ban ioh bam na kaba die ia u phan.

Ki jait jhur thymmai bapher bapher la hikai ban thung ne rep da I babu Jeebon Roy.

I dei u kpa ka pule puthi jong ka ri Khasi, lyngba ka jingsdang jong I ia ka skul M.E ha Shillong Mawkhar, wat hadien ka jingkyntait ka sorkar Phareng ban kyntiew ia ki skul sha ki kyrdan ba kham halor.
Bad kane ka skul ka dei ka skul kaba nyngkong duh ha ka thaiñ shatei lam mihngi ha kaba ki paidbynriew na sha Naga, Mizo bad kiwei kiwei ki wan ban shongskul hangtei.

Ka Ri Khasi Press, Mawkhar ka dei ka jaka shon kot kaba nyngkong duh ha ri Khasi bad ia kane ruh dei ma I hi ba sdang nyngkong, khnang ban lah ban pynmih paidbah ia ka jingtip shaphang ki Trai ri ki Khasi lyngba ki khasi ym lyngba ki Phareng. Bad ia kane ruh ki phareng ki la pyrshang ban khñiot hynrei kim lah satia.

Ka sor Shillong, ka nongbah jong ka Assam mynshwa bad ka Nongbah jong ka jylla Meghalaya mynta ka dei kaba la saiñdur bad pynwandur da I Babu Jeebon Roy.

Dei ma I, iba pyrsat mynsiem bad pynshlur ia ki samla Khasi ban seng bad don la ka jong ka Seng ban iada iala ka niam ka tynrai, riti dustur bad la tip i aka kum ka Seng Khasi.

I thoh shibun ki kot shaphang ka la jong, ka ri Khasi bad ka niam lajong, kum ka Kitab Shaphang uwei u Blei, ka Niam jong ki Khasi, ka History jong ka Ri India, bad ruh pynkylla Khasi ia ki kot Ramayana bad kiwei kiwei.

I ju ialam kai ia ki Khasi sha ri dkhar kum sha Kolkata, Delhi bad sha kiwei de ki jaka khnang ba ki Khasi kin tip ia ka rukom im jong kiwei pat ki para nong India.

Lehse dang bun kiei kiei ki kam kiba I la leh naka bynta jong ngi ki Khasi, hynrei ngi sniewbok namar ba ngi shah synshar ha ki bor nongwei kiba pyrshang ban pynjah rngai ia ki jingtip shaphang jong i. bad kane ka hiar raibi haduh mynta ruh, ngim shym la ioh satia kata ka jingkyntu naka liang ki bor pyniaid ban kynmaw ieid ia kano kano ka sngi kyrpang ha ka kyrteng jong I Babu Jeebon Roy Mairom, wat hadien ba ngi lah kynjoh ia ka 50 snem ka jingioh ia la ka jylla lajong. Kumta, lyngba ine I jingthoh nga kyrpad ia kito kiba pule ia kane ka jingthoh jongnga ba phin kynmaw pyrkhat sani bha halor ki kam jong I bad ruh ia wad bniah lang shaphang jong I bad ban kynmaw burom bad sngewnguh ia une u riewshemphang ba palat liam ka jaitbynriew jongngi bad ruh ban pynsngew lang sha ki pateng jongngi shaphang ka nam ba khraw jong u, shuh shuh ba ngin tip bad ithuh ia uta u Kpa Ka jaitbynriew Khasi kumba ong kiwei pat,i.e u Rai Sahib Sivnath Dutta.