Husiar! ong ka KSU, ia uba kam ki khun ar tylli ki khlieh bad u kpa, uba iap shah bat ilektrik

Shillong: Ka KSU Mawprem Unit hadien ba ka la ioh ia ka jingujor na uwei u samla ha ka 21/5/22, ba don uwei u bar jylla, uba wan lum pisa na ki nongshong shnong ka thaiñ Mawprem, da kaba sam ia ki kot appeal sha ki paidbah kaba ong ba u dei u briew bym nangkren, ba don ka para bym lah kren, ka kmie ba iap na ka daw ba shah puid por ba ka kha ia ki khun ba don artylli khlieh bad u kpa uba iap na ka daw ka jingshah bat electric, kiba bun na ki paradoh para snam da ka jinglui lui kila synniang pisa sha une u dkhar, khlem da kylli khlem da tohkit bha ban wad ia ka jingshisha. Mar sien ioh jingtip ka seng mardor ka la pyrshang ban thwet ia une u briew hynrei sniew bok namar ym lap dien shuh.

Shuh shuh haba ka Seng ka wad jingtip ia kata ka seng leh isynei kaba une u dkhar u la pyndonkam ban lum pisa, la shem ba kadei ka seng kaba na napoh jylla Andhra Pradesh. Kaba pynlyngngoh shuh shuh ka long ba watla une u dkhar u wan lum pisa khlem da lah ban pyni ia kino kino ki kot ki Sla kiba ki Bor Synshar District ne bor synshar shnong ki ai jingbit ia u ban lum pisa na ki paidbah, hynrei da ki phew ngut ki paidbah na kane ka jaka ki la synniang pisa kylluid mynsiem da ki lut 500,200 bad 100.

Lada ki paidbah ka bri Hynñiewtrep ki kylluid mynsiem ban synniang jingiarap ia ki paradoh parasnam lajong kiba duk, ba jynjar ba pang bad shitom kumba ki kylluid mynsiem ban ai sha une u mynder, kane kan long ka jingkyrkhu bakhraw eh ia ki paradoh parasnam kiba mad shibun ki jingjynjar ha kine ki khyndiat por na ka daw ka jingshah lynshop ha ki bor mariang. Phewse ka long mar khongpong. Ia u mynder te ki ia doh, ia u jong lajong te baroh kin kynthoh laiphew jait lada u leh kumba leh une u mynder.

Kumta lyngba kane ka kyrwoh ka KSU Mawprem Unit ka kyntu ia ki paradoh para snam, ia ki nongsynshar shnong, bad ki dkhot jong ka seng na kylleng ka bri Hynñiewtrep ba kin peitngor, ban husiar na ka jingwan shim kabu kum kine ki briew kiba ka seng ka i suba jur ba ka dei ki scammers. Kaei kaba la jia ha Smit ba u dkhar ba leh mynleh kum u nongdie tiar, u dei pynban u nonglute ia kawei ka longkmie. Ha kane kynti ruh, ñiuma kum une u briew ba wan lum pisa donation na ki paidbah kane ka dong ka thaiñ ruh u lah ban dei pynban u nonglute ynda u la iohlad.