Rah lama iong ka Congress ba shah sospon ki MP

Shillong,5 Nailar:
Ka Congress ha ka jylla kaba la lam khmat da ka Meghalaya Pradesh Youth Congress ka deng lama iong ryngkat ki jingthoh pla kad kiba thoh pynrem ia u myntri rang bah duh ka ri u Narendra Modi, namar ka jingshah sospon ki 25 ngut ki MP Lok Sabha katei ka seng ha ka Lamphang ka iing dorbar bah ka Ri ka Parliament.
U President jong ka Youth Congress u Richard MMarak u la ong ba ka long pyrshah ia ka riti jong ka ri synshar paidbah ban sospon ia ki MP jong katei ka seng, tang na ka daw ba ki la kren ia ka jing kynnoh bamsap pyrshah ia ki lai ngut ki myntri ka sorkar BJP ba kynthup ia ka Sushma Swaraj, Va sundhara Raje bad Shivraj Singh Chouhan. U la kynnoh ba ka sorkar u Modi ka synshar donbor marwei bad ka la pyniap noh ia kata ka jinglong laitluid ban kren bad u la kynnoh ruh ba ka la pynkhein ia ka hok jong ki nong India da kaba khanglad ruh ia ka rukom bam rukom dih jong u briew.
“Peit nuksa ia ka Gharwapsi, ka jingkhang ia ki NGO, ka jingkhang bam doh masi, ka ain khyndew, ka jingkhang phlim awria, kane ka dei ka roi ka par ba kin leh hadien ba la ai bor ia ki?  Ka youth Congress kan ia khun ia kiba kum kitei ki jingleh donbor bad ula ong shuh shuh, ba ki MP ka seng Congress ki la shah sospon tang namar ba ki dawa hiar shuki ia ki lai ngut ki myntri ka sorkar BJP” ong u President ka Youth Congress. Ka Congress ka la pynlong ia ka jingiakhih pyrshah jong ka da kaba pyrta ia ki sur pyrta kaba la pynrem ia u Modi bad kaba ka la iaroh ia u MP ka Shillong u ma Vincent Pala ha khmat ka Congress Bhavan.
Ha katei ka jingia pyrshah ki samla ka Congress la iohi ba la don ki MDC katei ka seng ba kynthup ia u bah Donevan Kharwanlang, bah Gabriel Wahlang, bad Lamphrang blah, bad la iohi ruh ba ki don ki MLA ba kynthup ia u bah AL Hek, Sniawbhalang Dhar bad u bah Prestone Tynsong.