Ki lum ki la twa, ki lyngkha ki la tap um, ki surok ki la khyllem; ki paidbah ki ap sa ban khyllem sa ka sorkar, ong U bah George B Lyngdoh

Shillong:U MLA ka Umroi Constituency, uba dei ruh u Opposition Chief Whip u Bah George B Lyngdoh, haba kren bad u Rupang, halor ka jing khyllem u mot pyllun ba la tei ha tnum ka ïing dorbar thaw aiñ ka jylla ha Mawdiang diang, u la ong ba ïa ka ïing dorbar thaw aiñ, la ju ong ka ïing kyn tang jong ka jylla bad lada ha por dang tei ka khyllem kane ka dei ka jinglehraiñ kaba khraw ïa ka jylla.

“Mut dur lada kane ka jingjia ka jia ha ka por ba ngi dang don ka jingshong dorbar bad kane ka jia ha kata ka por ngin sakhi ïa ka jingïam briew kaba shyrkhei bad ngin lah ban duh lut ïa ki nongïalam saiñ pyrthei kiba don ha ka liang synshar bad liang pyrshang, ngin duh ruh ïa ki ophisar bad wat ki nongthoh khubor” ong u Bah George.

Ha kaba ïadei bad ka jingong u Executive Engineer ba ka jingkhyllem u mot pyllun ba dei na ka daw ka jingduna u Contractor bad u designer u la ong ba “Lada ki kam ki ïaid beit baroh baroh ki kam ba dei ma ki ba leh bad lada don pat ka jingthud baroh baroh ki thed kti ban shim jingkit khlieh bad dei na kata ka daw ba baroh kiba don kti ha ka ban tei ki dei ban shim jingkit khlieh kaba pura”.

Shuh shuh ha kaba ïadei bad ka jingthmu u Lamphang ban thung da ka kynhun tohkit, na ka liang u Bah George u la ong ba baroh ki kynhun tohkit kiba la dep thung haduh mynta ngim pat ïoh ïa ki kaiphot la ha kaba ïadei bad ka bording ne kiwei kiwei hynrei ki file ki shu sop pumpum ha secreteriat bad lehse lada thung kynhun tohkit, mynta ruh, kan jia hi kum kane ka apot, ong u Bah George.
Haba jubab pat halor ka jingjia kiba paw pyrthei kum ka jingjaw um ka jaka pynsahngeh bos ha Mawiong, ka jingjot ka jingkieng Mawlai Bye-Pass bad kiwei de ki jingtei, na ka liang u Bah George u la ong ba ka mariang hi ka pynpaw pyrthei ïa ki kam jong kane ka sorkar.

“Ngi sakhi ba ki lum ki la twa, ki lyngkha ki la shah tap um, ki jingkieng bad ki surok ki la khyllem mynta ki paidbah ki ap sa ïa ka jingkhyllem jong ka sorkar” ong u Bah George.
Shuh shuh na ka liang jong u u la ïathuh ba kum ka liang pyrshah kin rah ïa kane ka mat ban ïatai ha ka dorbar kaban wan namar kane hi ka dei beit ka ijot kaba khraw ïa ka jylla.