Shah kem u lehnoh Pakistan ha Jammu

Udhampur, 5 Nailar:  
Ki bor pahara ka India ki la iathuh ba mynta ka step ki la ioh kem ia uwei u dkhot ka seng lehnoh na Pakistan uba la donkti ha ka jinghiar thma ia ki bor pahara ha Jammu and Kashmir Udhampur, la kem ia u da ka jingiarap ki nongshong shnong katei ka shnong.
“Na ka jingtohkit la lap ba utei u lehnoh uba la tip kum u Usman u dei na Faislabad, Pakistan” ong u Danish Rana, Inspector General ka Jammu, haba kren sha ki lad khubor. La ong ba ka kyrteng utei u lehnoh ka dei u Mohammad Naved bad u la phla ba ki don ar ngut ki lehnoh Pakistan ha kane ka ri India mynta la kumba 12 sngi eiei.
Kitei ki ar ngut ki lehnoh ki dei kiba la donkti ha ka kam hiar thma ia ki shipai India ha ka 26/11 ha ka surok bah hajan Samruli kaba jngai kumba 10 km na Udhampur, ha kaba ar ngut ki shipai ki la iap bad uwei u lehnoh u la kyllon iap ha ka jingiasiat ba mar kylliang.
U Usman u la phet rieh ha kawei ka shnong bad u la ialam lai ngut ki trai shnong ki ban iarap ban pyni lynti ia u ban phet krad na ka jingkhynra ki pulit bad la ong ba u la mareh sha ka liang ba don ka skul, hynrei katei ka skul ka la khang namar ba ka don ka jingiakhih, hapdeng ka jingkutlad la ong ba utei u lehnoh u la sei da ka suloi AK-47 ban ther kuli sha ki pulit bad la ong ba ha katei ka por ka la don ka jingiaksaid bad kitei ki trai shnong ha kaba la don uba ong , ‘pyllait ngan leit noh’ bad la antad ba ka don ka jingiakhun bad ka jingiaksaid hapdeng utei u lehnoh bad ki trai shnong kiba u la tan jubor ha kaba ki la ksih ia u ryndang jongu bad khlem ailad ban phet haduh ban da poi ki pulit.