Ha ka Pynshngain Democratic Front, ong U Bah Ardent rKi paidbah kim dei ban shah ialam bakla

Shillong, 4 Nailar:
U bah Ardent Miller Basaiawmoit, Chief Executive Member barim ka KHADC u la ther kylla ia ka jingkynnoh ka PDF ia ka ARPA halor ka jingjot rathai ka Khasi Heritage Village ( KHV) ha kaba ka la ong ba ka ARPA kam shym la peit la sumar bad ka la pynduh ruh ia ka Khasi Heritage Management Committee. Ha lor katei ka jingkynnoh ka PDF u bah Ardent u la ong ba ka jingbym treh ka ARPA ban peit ban sumar ia ka KHV, ka dei namar ba kam pat kwah ban ktah katba dang iaid ka jingtoh kit kaba ka EC ka ARPA ka la thaw, u la ong ruh ba la thaw ia ka kynhun tohkit namarba la mih ki jingkynthoh kiba la don kiba lap da ka RTI ba ka la don ka jyrsieh bamsap kaba jur na ka jingpynlong ia ka tamasa Monolith.“U CEM u la don ha ka jing kutlad, ka jinglynga mynsiem bad u la iaid bakla da kaba kynnoh khlem ki jingshisha, ki paidbah kim dei ban shah ialam bakla ha katei ka kynhun kaba ngi lah ban ong ruh ba ka dei ka Pynshngain Democratic Front” ong u bah Ardent haba kren sha ki nongthoh khubor mynta ka sngi. Halor ka jingpynduh pyndam noh ia ka KHMC u bah Ardent u la ong ba ka ju long ka rukom ha District Council ba haba ka samoi treikam jong ka EC ka la kut la pynduh noh ia kino kino ki komiti kiba la thaw.
Shuh shuh u bah Ardent u la ong ba kumba ka long haduh mynta ka KHADC kam shym la ioh bhah eiei na ka KHV kaba don ha Mawphlang, bad u la kynnoh ruh ba ka rukom pyniaid ia katei ka KHV bad kumjuh ia ka tamasa Monolith ka long ka bym shai, ha kaba la mih ruh ki jingkynthoh wat na u EM barim ka KHADC u ba peit ia ka Arts and culture u bah Teinwell Dkhar kaba u la kren ruh ha ing dorbar.
Halor ka jingphah tohkit ia ka jingkynnoh bamsap ha ka tamasa Monolith bad ki jingtei ba la tei ha katei ka shnong tynrai ka KHADC, u bah Ardent u la ong ba um shym la kynnoh ba ka don kata ka bamsap hynrei hadien ba la iohi ba ki la don kiba wad jingtip lyngba ka RTI, ka ARPA ka kwah ban tip ia ka jingshisha bad ka la thaw da ka kynhun tohkit.