Nongpoh: Ka St. Pauls Higher Secondary School Nongpoh, ka la long kum ka lahduh haka lympung ialehkai sports kaba la tip kum ka District Level Inter School Athletic Meet 2022 ia kaba la pynlong da ka ophis u District Sports Officer Nongpoh ha Madan NSCA Pahamsyiem.
Ia katei ka lympung ialehkai sports ki skul ha Ri Bhoi, la pynlong 3 sngi kynthih bad ki la don kumba 23 tylli ki skul na ki jaka bapher bapher ha Ri Bhoi, ki la wan ban iashimbynta, kumta ha ka jingialehkai kiba bunjait, ka St. Pauls Higher Secondary School Nongpoh, ka la lah ban tam ia kiwei ki skul haba khein ia ka jinglah ban ioh Points bad kaba la pynthikna ia katei ka skul ba kan long kum ka lahduh na baroh ki skul ha Ri Bhoi.
Kiba la donlang ha katei ka sngi kaba la pynkut noh ia katei ka lympung ialehkai ki skul ha Ri Bhoi, ki kynthup ia u bah Sosthenes Sohtun, MLA Jirang uba la long kum u kongsan, nangta ka kong Paidolyne L.Nonglait, DSEO kum ka symbud kongsan, u bah Bobby L Nongbet DSO Nongpoh, ki nonghikai, ki khynnah skul lem bad shibun kiwei pat.
Haba phai halor ka jinglah ki khynnah na ki skul ba kin ialehkai bha ha ki kyrdan bapher bapher, ha ka U-18 ki kynthei bad shynrang la rah da ka St. Paul’s HSS, haka U-16 ki kynthei la rah da ka St. Alfred’s Secondary School Marngar bad ha ki shynrang la rah da ki khynnah ka St. Joseph Higher Secondary School. Haka U-14 ki kynthei la rah da ka St. Johns Secondary School Jyntru bad ka Little Blossom Secondary School ha ki shynrang.
Phi don ban ong eiei?