“Weng thied jaka ha Mawkyrwat, ban pynhun ia u bah Hadrian”

Shillong, 4 Nailar:
Hadien ba la mih ki jingkynnoh na ka Executive Committee jong ka Khasi Hills Autonomous District Council (KHA DC) ba ka jingthied ka jaka ka Council ha Maw kyrwat ka dei tang ka jingleh marwei u CEM barim ka KHADC u bah Ardent Miller Basaiaw moit ha ka por ka jing long CEM jong u khlem ka jingtip jong ka EC lane khlem da iaid katkum ki kyndon thied jaka, kaba hap ban don saw san tylli ki jaka ba ka Council ka hap ban jied. U bah Ardent haba kren sha ki nongthohkhubor mynta ka sngi u la ong ba katei ka jingkynnoh jong ka PDF ka dei ka bym don nongrim naba ia katei ka kam la sdang naduh ka EC kaba ha shuwa ka EC jong u ha KHADC. U la ong ba ia katei ka jaka ha Mawkyrwat ka dei kaba la ia kren u bah Antonio War u EM ba peit ia katei ka tnad bad u MDC barim ka Mawkyrwat u bah Enbin K Raswai ha u snem, hynrei ma u pat kum u EM ba peit ia ka pla tyngka ka KHADC u shu buddien tang ban mang tyngka na ka bynta katei ka jaka kaba ki la dep ia kren. “Ka la don ka jingthmu jong u bah Antonio bad u bah Enbin ban leit peit ia katei ka jaka, hynrei ka la sahteng na ka jingjia aksiden u bah Enbin ha ka por ba pynlong ia ka tamasa Monolith” ong u bah Ardent. Shuh shuh u la ong ba ki la don ki kynhun jong ka Council kiba la leit jngoh ia katei ka jaka kaba ka KHADc ka la don jingthmu ban thied ha Mawkyrwat bad hadien ba ki la wan jngoh ki la lap ba ka dei ka jaka kaba biang tam ban shna ia ka shnat treikam ka KHADC.
Halor ka jingweng noh ka KHADC ia ka jingiasoi ia thied jaka ha Mawkyrwat u bah Ardent u la ong ba ka dei tang ka jingkwah ka PDF ban pynhun ia u MDC ba mynta ka Mawkyrwat u bah Hadrian Lyngdoh, “Ki daw ki dei tang ka jingkwah ban pynhun ia u MDC ka Mawkyrwat, namarba u la byrngem ba lada kim thied ia ka jaka kaba u kwah un ym kyrshan shuh ia ka PDF” ong biang u bah Ardent. Halor ka jingbym jied ka KHADC ia ki saw san tylli ki jaka kumba la kynnoh da ka PDF, u bah Ardent u ong ba ka KHADC kam treh shuh ban jied ia kiwei ki jaka naba ka la lap ba katei ka jaka ka dei kaba paka, la ha ka jingheh ne ka jingjan ka ban pynsuk ia ki paidbah ba leit donkam. Utei u CEM barim ka KHADC u la ong ruh ba katei ka jaka ka dei kaba ki paidbah ka Mawkyrwat ruh ki kwah bad u la ong ba ki la don ki sengbhalang, ki seng trei mon sngewbha kiba la byrngem ba lada jia ba ka KHADC kan pynkynriah ia katei ka jaka kaba dep ia soi ki la byrngem ban ia khih tyngeh.