Ba bun ki nong pyrshah; pan jingshai U Lat, halor ka VAB rPoi ka jingthoh na DCA sha ka KHADC

Shillong, 04 Nailar:
Ka Village Adminis tartion Bill (VAB) ka KHADC kan nang slem shuh shuh mynta ha kaba, la ioh jingtip, ba u Lat ka jylla u V. Shanmuga nathan u pan jingshai shuh shuh na ka sorkar jylla hadien ba u la ioh ia ka jingpyrshah kiba bun na ki paidbah, halor ki kyndon jong kane ka Bill.
Kat kum ka jingtip, ka sorkar jylla lyngba ka tnad District Council Affairs ka la phah ia kane ka jingpan jingshai u Lat sha ka KHADC ba kan ai ia ka jingshai halor ki jing ujor jong kiba bun ia ka jingbym biang jong kane ka Bill. Katkum ka jingtip, ki jingpan jingshai jong u Lat ka long halor ka jingpyrshah ba la leit ujor jong ka Thma u Rangli (TUR), Seng Khasi Mawsynram, bad kiwei kiba la thep ia ka jingujor sha ka ophis jong u Lat ka jylla ba nym pat pdiang ia kane ka VAB namar ba ka dang long kaba dkoh. Haduh mynta na ka liang ka Joint Action Committee jong ka Synjuk Ki Rangbah Shnong (SKRS) ka la shim ia ka rai ba kin pynlong ia ka Dorbar ki Rangbah Shnong jonng ka ri Khasi Jaintia ha ka 22 tarik Nailar 2015 ban iakren halor ka jingpynslem u Lat ka jylla ban rai halor ka Village Administration Bill (VAB) 2015. Ka jingialang ki SKRS ba long ha ka 30 tarik Naitung ka la sngew dei ban khot ia kane ka Dorbar ban pynshai ia ka jingiaid jong ki kam bad ban ia phylliew jingmut bad ha kajuh ka por ban iit ia ki lad ki lynti kumno ban ioh kha kloi ia ka rai halor ka VAB khnang ba ki Dorbar shnong kin ioh ban bteng biang ia ki rukom treikam jong kin a ka bynta ki paid nongshnong, la ong u general Secretary ka SKRS u bah RL Blah.
Ka jingialang ka la rai ruh ban pyrshah ia ka Ordinance jong ka sorkar kumba la rai kham mynshwa.
“Kane ka long ka jingpyntip bad ka jingpyn kynmaw sha baroh ki Dorbar shnong ka ri Khasi Jaintia ba ngin ieng skhem da kawei ka jingmut tad haduh ba ngin da ioh ia ka VAB”, la ong shuh shuh u Bah Blah.
Ka Synjuk ka la pyrshah jur ia ka jingwan tuklar jong ka MUDA ia ka jingshna iing shna sem shabar u pud u sam jong ka.  Ka JAC ka pyrshah jur ia kane ka jingleh donbor ka MUDA khlem da kynjoh ktien ne iapynbeit shwa bad ka District Council bad ka kyntu ia ka MUDA ba kan weng noh ia ka jingpynbna jong ka khnang ban ym pynkulmar bad buh jingeh ia ki nongshong shnong khamtam ia kito kiba donkam ban ioh iing ba kin shong kin sah, la pynkut bah Blah.