Tang 35 kilo u khaw rashon shi byrni ha EJH: Ar Seng

Shillong, 4 Nailar:
Ki ar tylli ki seng bhalang jong ka ri lum Jaiñtia ki la leit ai dorkhas sha u DC East Jaiñtia Hills ban shim khia halor ka jingduna ka jingduna thew palat u khaw rashon ha East Jaiñtia Hills. Kine ki arseng ki la pynpaw ba ki ioh jingujor na ki katto katne ki nongsam khaw rashon ba ki Whole Saler ki khlem thew ia u khaw shuwa ban ai sha ki nongsam.
Halor katei ka phang ki ar seng ki la leit jurip ia ka kudam ka FCI kaba don ha Khliehtyrshi, West Jaintia Hills ban ioh jingpynshai halor ka rukom pyllait khaw sha East Jaintia Hills, ki la ioh ia ka jingpynshai na FCI ba ia u khaw rashon kim juh pyllait khlem da thew.
Kumta ka Ri Jaiñtia Youth Federation sengkmie lyngba u general secretary bah P.P Lyngdoh bad ka Jaintia Labour & Unemployed Youth Organisation general secretary bah C.L Suchiang ki la ai noh shi syndon da ka dorkhas DC East Jaiñtia Hills ba un shim khia bad ban hukum ruh ia ki wholesalers ban thew shwa ia u khaw rashon shwa ba kin pynlait sha ki dealer ne fair price shop.
“Katkum ba long mynta ki wholesalers kim juh thew ia u khaw shwa ban kin ai sha ki dealer. Ki shu khein beit ba ia u khaw rashon u don 50 kilo shi byrni, Hynrei ha ka shi byrni u don pynban tang 35 bad haduh 42 kilo, bad kane ka long ka jingduhnong kaba khraw ia u paidbah ha kane ka thain namar ba busien hi kiba dei hok ban ioh kim juh ioh katkum ba la mang ia ki da ka sorkar khamtam ia kito ki BPL card bad kiwei kiwei de ki jaitkhaw” ong ka kyrwoh na ki ar seng.