Mana theh niut na Sanmer sha Lum Shyllong

Shillong, 04 Nailar:
U Deputy Commissioner ka East Khasi Hills District, Shillong u la pynjari da ka kyndon Section 144 CrPC da kaba mana ban bret niut ha Syntai Lum Shyllong ter ter naduh Sanmer.
Kane ka hukum kan treikam mardor bad u DC u la pynjari da kane ka kyndon hadien ba la ioh ia ka jingujor na ki paidbah ia ka jingbret pathar ki briew ia ki jaboh ha lynter ka surok naduh Sanmer shaduh u Syntai Lum Shyllong.
U DC u la ong ba katkum ka jingleit tohkit jong ki briew na ka DC ophis, lem bad ki nongtrei na ka PHE, PWD, Soil and Water Conservation bad ka Forest bad Environment bad ki bor shnong ka thain Upper Shillong, la shem ba nalor ka jingbret jaboh, ki briew ki la pyndonkam ban pynlong kum ki jaka theh niut kum ki dawai bad kiwei ki tiar ba don jingma bym lah pyut.
Ka surok na Sanmer sha Syntai Lum Shyllong ka dei kaba ju pyndonkam bha ki nongleit peitkai na utei u Syntai Lum uba iohi kdiar kdiar ia ka sor Shillong.
Kane ka hukum kan treikam noh mardor haduh ban dap pynbna da kumwei pat.