Ym lah ngeit ba u Aadhar number, kum u number ‘666’, ong u Pastor Phawa

Shillong, 03 Nailar:
Ka jingiakren bad ka jingialap khana sha phang u number Aadhar kum uta u number 666 ne mrad khlaw katkum ka jingthoh ba la paw ha ka kot niam Baible, kam long kaba lah ban ngeit ban pyniasoh ia une u number ka sorkar bad u number ka bible.
Ban kham ioh jing shai halor une u number 666, u Rupang u la ioh ban iakren kham bha bad u Pastor NS Phawa uba la pynpaw ba haduh mynta katkum ka jingsngew jongu, u number Aadhar um don jingiadei bad u number 666.
“Ka ktien u Blei (bible) kam kdew ia u Aadhar number katkum ka lyn nong ka kitab jingpynpaw ba 13, dkhot ba 18”, la ong u Pastor Phawa.
U la ong ba ka khu bor ba pynsaphriang ia ka jingiadei u Aadhar num ber bad u 666 kam mih na ka Forum kaba dei hynrei la shu ialap bad iakren ki briew shane shatai.
“Ha ka jingsngew jong nga, ym dei ban sheptieng ia u Aadhar number, hynrei ka shong ha ka mon laitluid jong u briew ban batai katkum ka jingsngew jongki”, u la ong.
“Haduh mynta ngim pat ioh sngew ba don u briew ne ki briew kiba la lah ban pynthikna ba u Aadhar number un don jingiadei bad u number mrad khlaw 666”, la ong biang u Pastor Phawa bad bynrap, lada don shisha kiba la ioh ia ka jingshemphang lyngba ka bor jong u Blei, ngim lah ban ong eiei ne ban pyrshah”,.
“Haba nga ong kumne, kam mut ba nga kwah ban iakhun ne iatainia pyrshah iano iano hynrei ka dei ka jingsngew jong nga”, u la ong.
Katkum ka jingong u Pastor Phawa, ka sorkar ka la thmu ban pyntreikam  ia u Aadhar number ban lait na ka jingshah thok, jingpyndonkam bakla bad ban pynthikna ia ka jinglong jong uwei pa uwei u briew kum u nongshong shnong ka India.
“Haba wan u briew na Bangladesh ne na kiwei ki ri u lah ban kam u nong-India hynrei lyngba u Aa dhar kim lah ban kam namar ba ka rekod jong uwei pa uwei u briew la dep buh ban pynshisha”, u la ong.
Ia u Aadhar number la shim ia ki dur jong ka sympriah kti bad ki khmat (iris) ha kaba kine kim don jingiadei eiei badno badno bad ki don beit tang ha uwei u briew ne ka briew.
Lah ban kdew ba ha kine ki snem ba la dep, la don katto katne ki shnong ha kane ka ri Khasi Jaintia kiba kyntait ban leh ia u Aadhar number namar ba ki shim ba une u number u dei u number ki mrad khaw ne 666 katkum ka jingthoh ha ka Bible.
Haduh mynta, ka sorkar kam pat lah ban pyn treikam ia une u Aadhar number namar  ka la don ruh ka jingpyrshah na ki paidbah, ki sengbhalang.
Mynta u snem ka sorkar ka la thmu ban sdang biang ban leh ia une u Aadhar number ha Community and Rural Development Block Nongstoin hynrei katkum ka jingtip, dang bun bah ki briew kiba pynpaw ba kim pat sngewthuh bha ia une u Aadhar number.