Weng ka KHADC ia ka jingiasoi T.35 lak ha Mawkyrwat

Shillong, 3 Nailar:
Ka Executive Committee ka KHADC kaba la long mynta ka sngi ka la rai ban weng noh ia ka jingiathied bad ka jing iasoi jaka jong ka Council ha Mawkyrwat. U bah Pynshngain N Syiem, CEM u la ong ba katei ka jaka ka dei ha Laitlawsan ha Mawkyrwat bad ka dei ka jaka jong u bah Nolip star Lyngdoh. U la ong ba katei ka jaka ka don ka jingheh kaba 11,750 Sq.Ft, bad ka shong dor T.35, 29, 039 tyngka (Laiphew san lak ar phew khyndai hajar laiphew khyndai tyngka) kaba la hap ha ka dor T.300 tyngka shi Sq.Ft.
U bah Pynshngain, u la ong ba la weng noh ia katei ka jingiasoi namar ba la leh khlem da iaid ia ki kyndon kiba donkam ban iaid, kaba u la ong ba dei ban don kumba saw san tylli ki jaka ha la ki jong ki dor khnang ba ka Council kan peit ia kano ka jaka kaba ka i mon, hynrei u la ong ba ka jingiasoi jaka ha Mawkyrwat ka dei beit tang ia kawei ka jaka.
U la kynnoh ruh ba katkum ki kot ki sla la ia soi beit tang da u Chief Executive Member barim ka KHADC u ba Ardent M Basaiawmoit, khlem ka jingioh jingmynjur na ka Executive Committee kaba u la ialam ha kato ka por ba u dang long CEM. U CEM ka KHADC u la pyntip ruh ba haduh mynta ka KHADC kam pat siew shipiah ruh sha u bah Nolip na ka bynta katei ka jaka. Shuh shuh u CEM u la iathuh ba ka jingiasoi hapdeng u bah Ardent bad bah Nolip na ka bynta katei ka jaka ka dei na ka bynta ban shna ia ka shnat ophis jong ka KHADC ha Mawkyrwat. U la ong ruh ba kane ka EC ba mynta kan wad kumba saw san tylli ki jaka bad kan peit kano kaba kham biang na ka bynta ban thaw ia ka shnat treikam thymmai.