Ther u bah Paul ia u bah Ardent, na ka lama Pakistan

Shillong, 3 Nailar:
U bah Paul Lyng doh, MLA ka Shillong West u la ther tyngeh ia ka jingkynnoh u bah Ardent M Basaiawmoit, uba la kynnoh ba la pynieng da ka lama Pakistan ha ki thain ka Mawbah kaba dei ka konstitwensi jong u. U bah Paul u la ong ba katei ka jingkynnoh u bah Ardent ka dei ka jingthmu ban pynmih ia ka jing ia isih jaitbynriew. “Ka dei tang ka jingthmu ban pynmih huri hura bad ka jingsngew jaitbynriew, khamtam da kaba kdew pyrshah beit tang ia kawei ka niam” ong u bah Paul Lyngdoh. U bah Paul u la ong ba U bah Ardent um sngew eiei ia ka lama jong ka HSPDP kaba ia syriem ia ka lama jong ka ri France, ha kaba ka la don ka juh ka rong saw, rong lieh bad ka rong jngum bad kitei ki rong ha ka lama ki dei kiba la pynwan dur da pynieng.
Ha kaba iadei bad ka jingkynnoh ba wah lama Pakistan, u bah Paul u la ong ba ha ka jingshisha la wah lang ia ka lama rong saw ryngkat bad katei ka lama rong jyrngam kaba ki la kynnoh ba ka dei ka Lama Pakistan, “Kumno um tip ba ha ka jingshisha katei ka lama ka lah ruh ban long jong ka Turkey? Balei tang ka Pakistan?” kylli u bah Paul. Utei u MLA ka Shillong West u la ong ba ym dei ban wanrah ia kum katei ka hamsaia, naba baroh ki ba shong shnong ha katei ka thain Mawbah ki dei ki nong India kumba long kiwei pat.
Lah ban kdew ba kham mynshuwa u bah Ardent u la ujor bad dawa ban tohkit bad ban pynshisha mano ba donkti ban wah da katei ka lama kaba u la kynnoh ba ka dei ka lama Pakistan , ha kaba u la dawa ruh ba dei ban pynshitom ia ki trai iing kiba ai jingbit ban sieh ia kitei ki lama ha kaba u DC u la buddien ia katei ka kam bad u la weng ia ka jingujor u bah Ardent.