Shah beh dorbar U Ma Vincent bad 26 ngut ki MP Congress rBa ki pynthut ia ka jingshong dorbar Lok Sabbha

New Delhi, 3 Nailar:
Ka Lamphang jong ka Ing Dorbar bah ka Ri ka Sumitra Mahajan ka la beh dorbar haduh 5 sngi kynthih, ia ki 27 ngut ki MP ka Seng Congress ba kynthup ia u Ma Vincent Pala, u MP ka Congress na Shillong, namar ba ki la pynthud ia ka iing Dorbar ha ka dorbar bah kaba la long mynta ka sngi.
Ka Lamphang ka la sospon ia kitei ki MP Congress namar ba ki la pynwit ia ka iing dorbar da kaba ia hylla bad rah pla kad wat hadien ba ka la maham ia ki la bun bunsien. Kitei ki MP ka seng Congress ki la pyrta hapoh ing dorbar ba ki dawa ba ki nongialam ba ha khmat ka BJP ki dei ban hiar shuki noh namar ka kam u Lalit Modi bad ka bamsap Vyapam. Ki MP ka seng Congress ki la dawa ba ka sorkar ka dei ban weng noh ia ka myntri bar ri ka sorkar pdeng ka Sushmita Raj bad u myntri rangbah ka Rajasthan u Vasundhara Raje namar ki la kynnoh ba ki dei ki nongiarap ia u Lalit Modi katba ia u Shivrah Singh Chouhan u myntri rangbah ka Madhya Pradesh ki la kynnoh ba u donkti ha ka bamsap Vyapam kaba da ki klur tyngka.
Tang katto katne por hadien ba ka Lamphang ka la rai sospon ia ki 27 ngut ki MP ka Congress la iohi ia u Rahul Gandhi, ka Sonia Gandhi ba ki ia kren pasiaw bad kiwei pat ki nongialam ki seng sain pyrthei kiba don ha ka Liang pyrshah bad tang hadien katto katne por kitei ki seng ba kynthup ia ka Trinamool, Nationalist Congress Party, CPI(M), AAP bad ka Janata Dal United ki la rai ban ym leit dorbar ha kine ki san sngi ban wan kum ka da ka jingpyrshah ia ka jingshah sospon kitei ki 27 ngut ki MP. Kham hadien ka Sonia Gandhi, President ka seng Congress ka la pynbna ha ki kot khubor ba ki Liang pyrshah kin ym leit dorbar ha kine ki san sngi bad ka la pynbna ia ka kum ka sngi rah lama iong. Katba kiwei pat ki jingkynthoh ki la mih na ki nongialam Congress ia ka seng BJP hadien katei ka jingjia ha kaba ki la ong ba kane ka dei ka jingjia kaba ju jia ha Maharashtra ka jylla ba synshar ka BJP ha kaba la ju sospon ia ki liang pyrshah na ka por sha ka por, bad ki la kynnoh ba la pyntreikam ia ka rukom synshar Maharashtra ba ing dorbar bah ka Ri. Lah ban kdew ba ka ing dorbar bah ka ri ka la sdang naduh ka 21 tarik u naitung, 2015.
Ki 27 ngut ki MP ka Congress kiba shah sospon ki kynthup ia u B N Chand rappa, Santok Singh Chaudhary, A H K Choudhury, Sushmita Dev, Ninog Ering, R Dhruvanarayana, Gaurav Gogoi, G Sukender Reddy, Deepender Hooda, S Kodikunnil, S P Muddahanume gowda, Abhijit Mukherjee, Mullappally Ramachandran, K H Munniyappa, B V Nayak, Vincent Pala, M K Raghavan, Ranjeet Ranjan, C L Ruala, T Sahu, Rajee Satav, Ravneet Singh K Suresh, K C Venugopal bad T Meinya.