Ka Check Point ïa ki mrad ban shoh doh, ka kylla long ka ktem ki nonglute: KJBWA

Shillong:Ka seng ki nongot doh masi hapoh ka shatri jong ka Khasi Jaintia Butcher’s Welfare Association(KJBWA), myn hynnin ka sngi ki la pynpaw ïa ka jingeh kaba ki ïa kynduh na ka daw ka jingbym ïoh masi shohdoh shuh na sha bar jylla.

Haba kren sha ki lad pathai khubor, u President ka KJBWA u Bah Generous War langpih u la ong ba ka jingkyrduh masi ka dei beit naduh ba ka Assam ka la wanrah ïa ka aiñ khang shoh doh masi. Shuh shuh u la ïathuh ba ka jingdon ka Check Point kaba ka seng hi ka dawa na kaba sdang khnang ba ka tnad Animal Husbandry & Veterinary kan pynthikna ba ki masi kiba poi sha ki nongbam doh kin long kiba paka ban bam hynrei ka long pynban mar khongpong bad kane ka Check Point ka kylla long pynban ka ktem ban ïoh lute na ki nongot doh.

Ha kaba ïadei bad ka ka permit ba ka sorkar ka ai ïa ki nongshoh doh masi u Bah Generous u la ong ba kat haduh mynta ym pat don satia kawei ruh ka masi kaba ki nongshoh doh ki ïoh lyngba kane ka permit bad ki mahajon pynpoi masi na sha kiwei ki jylla ban pynpoi masi ha Assam kim shlan satia namar ka jingpyrkhing palat pud ka sorkar Assam.

Haba kren halor ka jingkiew ka dor jong ka doh masi u Bah Generous u la ong ba kum ki nongkhaïi ba lada ki sngew ba kim im ban die ha ka dor 10 tyngka, ki ju kyntiew sha ka 12 bad lada kim sngew im 12 ki kyntiew 15 bad ka long thik ruh ïa ki nongdie doh masi. Kat kum ka jingïathuh jong u Bah Generous u la ong ba ka ïew die doh masi ka la hiar shaba palat namar ha ki por kiba mynshuwa na ka jaka shoh doh masi ha Mawiong ki ju shoh la kumno kumno 30 haduh 35 tylli katba mynta pat tang ar tylli ha ka shistep.
Kumba long mynta lei ka jingpoi ki masi sha ki nongot doh na shabar jylla kam don shuh hynrei ka jyllei pynban ka jingpoi ki muid ïathuh u Bah Generous. Ka jinghiar ki masi sha Bangladesh ka long kaba shyrkhei kaba na ngi ki nongshoh doh masi ngim peiphang na shaei ki ïoh masi bynrap u Bah Generous.
Shuh shuh u Bah Generous u la ïathuh ba ki masi kiba ki shoh doh mynta ka dei beit kaba thied na ka jylla lajong bad kaba i thamula ka long ba wat ïa ki masi na ka jylla lajong ruh ki pulit ki kthong ban kem marsien ïohi ïa ki kali kit masi namar ki pyrkhat ba ka dei ka masi kaba thmu ban pynhiar sha Bangladesh. Kum ka seng ki nongdie doh masi mynta ngi rai ban sahngeh ym leh eiei shuh ïa ka kam die doh bad ngi ai laitluid beit ba ki nongot doh kin leh katba ki sngew shong nia bynrap u Bah Generous.
Haba bynrap lang ïa kane na ka liang u Ma Limba Dkhar u President ka Seiñ Ki Nongdai Doh Masi Jaintia u la ong ba ka jingkiew ka dor ka doh masi ka long beit na ka jingkyrduh masi ha ka jylla.