Donkam lai tylli ki jingialang Cabinet, ban sngap jingeh ki nonghikai

Shillong:Ki nonghikai adhoc ha ka jylla hapoh ka shatri jong ka Federation of All School Teachers of Meghalaya (FASTOM) mynta ka sngi ki la ïoh ban ïakynduh markhmat bad pynsngew ïa ki mat jingdawa jong ki ha khmat u Myntri Rangbah ka jylla u Conrad Sangma bad kane ka jingïoh ïa kynduh jong ki nong hikai ka long hadien ba ki la pynbna ba kin ïakhih da kaba sahmiet ha ha khmat ka secretariat lada u Myntri Rangbah ka jylla um ai por ban ïa kynduh bad ki.

Haba kren sha ki lad pathai khubor hadien ba ki nonghikai ki la dep ban ïakynduh markhmat bad u Myntri Rangbah ka jylla u nongai ktien ka FASTOM u Babu Mayborn Lyngdoh R, u la ïathuh ba u Myntri Rangbah u pan por shibnai ban pynurlong ïa ka mat jingdawa jong ki. Shuh shuh u Babu Mayborn Lyngdoh R u la ïathuh ba ka jingïakynduh hi ka long kaba sngewhun mynsiem namar ka jubab u Myntri Rangbah ka long ba un sa ïit bniah bad ïatai sani ha ki lai tylli ki sien shong jingïalang ka kynhun myntri.

Haba ïathuh ïa ka mat jingïakren u Babu Mayborn Lyngdoh u la ïathuh ba ka sorkar hi ka ïit bniah ba la ka jingkyntiew tulop kan long 18 hajar kumba ki la dawa lem ban ka jingpynkiew tulop ba 5% man la u snem ne ka lah ban khamtam ban ïa kaba ki dawa ruh.

“Ngin pynjem shipor ïa ka jingïakhih bad ngin ap kmang ïa ka 30 sngi kumba la pan por ka sorkar” ïathuh u Babu Mayborn.
Hadien ba ki nongïalam ka FASTOM ki la ïakynduh ïa u Myntri Rangbah ka FASTOM ka la rai ba kan weng shipor ïa ki jingïakhih ha kine ki 30 sngi ïathuh u Babu Mayborn.