Yn buh CCTV ha Nan Polok

Shillong, 03 Nailar: 
Ka jingshim kabu ki briew ban iadih sngewbha ban leh ia ki kam khlem akor hapoh kane ka jaka bam lyer ha Nan Polok, ka la pynlong ia ki bor ba dei peit ban shim khia noh ban pyrshang ban buh da ki kor ring video ne CCTV.
Haba iakren bad u Range Officer ka tnad Forest u Bah NL Marwein, u la iathuh ba ka la don ka jingphah jingtyrwa ban buh noh da ki kot CCTV ha kane ka jaka bam lyer pynngad ki briew namar ba ki don bun ki khep ba ki briew ki la shim kabu ia kane ka jaka ban pynlong kum ka jaka iadih iabam sngewbha bad leh ia ki kam khlem akor. “Na ka liang u Superintendent of Police (SP), ka East Khasi Hills ruh u la dep thoh ia ka jingdonkam ban buh CCTV noh ha kane ka jaka iaid kai jong ki briew khnang ban iada na ki kam sniew”, la ong u bah Marwein. Haduh mynta, kane ka jingthmu kam pat urlong satia bad ka dang don hapdeng ka jingiakren.
U la ong ba bunsien ki pulit ki la ioh kem ia ki briew kiba iadih ia buaid hapoh kane ka jaka iaid kai kaba pynlong khlem rain ia ki briew kiba wan rungkai khamtam ia ki khynnah, ki tymmen.
“Don ki khep ba ki nongtrei jong ngi, ki ju shah byrngem ha ki briew ba ju wan ban iadih kyiad tang namar ba kim shah ia ki”, u la ong bad bynrap, naduh ba la pyrkhing  ka jingshlur ki briew ban wan pynlong jaka iadih ka la kham duna ha kine ki sngi.
U la iathuh ba ka la don ruh ka jingiakren ban ker kynroh jrong noh ia kane ka jaka iaid kai khnang ban nym iohi shuh nabar bad ban khang lad ia ka jingrung pathar jong ki briew. Hynrei, kane ruh ka kam, ka dang sah ha ka jingiakren namar ba don kiba sngew ba lada ker kynroh, yn nym iohi shuh ia ki jingitynnad bad don pat kiba ong ba kan bha ban ker khnang ban pynlong ia ki briew ba kin rung.
Ka Nan Polok ka dei kawei ka jaka iaid kai kaba don ha kane ka nongbah bad ha u snem 2002 la shimti da ka tnad Forest ban peit ia ka.
Ka jingheh jong ka Nan polok ka long 6.28 hectare, kaba bym duna ia ka 6.30 lak sq ft.