42 ngut, leit wad jingtip ri masi sha Gujarat bad Siliguri

Shillong, 30 Naitung:
Ka tnad ri jingri ka jylla ha ka sien ba nyng kong, ka la ioh ban phah 42 ngut ki nongri masi ban leit wad jingtip bniah ia ka rukom ri masi ha jylla Gujarat bad sha Siliguri ka West Bengal.
Haba iakren bad  Assistant Director ka tnad Ri Jingri u Dr KB Sah khar mynta ka sngi, u la iathuh ba ia kine ki nongrep la ialam da ka tnad Ri Jingri mynta u snem kum shi bynta ba kin pynkhlain ban pynbha ia ka rukom ri masi jongki ha kane ka jylla da kaba ioh jingtip na kitei ki jylla.
“Ngi la ialam 25 ngut sha Siliguri bad 17 sha Gujarat bad ia kine ki nongri masi la shim tang kito kiba la don ha kaneka kam ri masi la slem bad kiba la aiti khambun ka por ha kane ka kam”, u la ong u Dr Sahkhar bad bynrap ba ka jingjied ia ki nongri masi ka long na kylleng ki jaka ka jylla kiba la don ha kane ka kam.
Katkum ka jingiathuh u Dr Sahkhar, kane ka dei ka sien ba nyngkong ba la ialam ban leit wad jingtip sha kine ki jylla bad ia ka jinglut jingsep la bei da ka sorkar pdeng namar ba ka sorkar jylla kam ju don pisa.
“Lada ngi ioh pisa ngi kwah ban ialam man u snem ia kine ki nongri masi hynrei ka shem jingeh namar ba ka sorkar jylla kam don pisa bad kane kaba ngi la ioh ban ialam mynta u snem ruh, ka dei ba la kyrshan pisa ka sorkar pdeng”, u la iathuh.
Ha Siliguri la pynsah shi taiew ia kine ki nongrep ban pule bad wad jingtip ia ka rukom ri masi ha katei ka jaka bad ha Gujarat pat la pynsah lai sngi, u la iathuh.
Nalor ka jingialam shabar jylla, ka tnad ri jingri na kane ka jylla ruh ka ju ai jinghikai man ka por ia ki nongri masi bad kumba ka long mynta ki don ar tylli ki jaka ri masi bad ha u Nohprah, yn sa pyntreikam sa saw tylli ki jaka ai jinghikai.
Katkum ka jingiathuh jong u Dr Sahkhar kim don satia ki skhim ban ai jingiarap pisa sha ki nongri masi namar ba ka sorkar kam don pisa bad baroh ka jingdonkam la lut hi da ki nongri jingri lait noh tang ka jingai jinghikai ba ka sorkar ka ju ai sha ki.