Da u tyrnem shoh maw, ngan tied na kti ïa u ophisar, uba khang ïa ka kamai ki nongtih maw, ong u Bah Lambor

Shillong:Haba kren ha ka jingïalang paidbah ba la khot da ka Joint Action Committee ki Stone Crusher’s Owner’s Association, Quarry Owner’s & Worker Association kaba dei ka synjuk ki trai parmaw par shyiap bad ruh ki nongbylla ba im ja na kane ka kam kaba la pynlong ha Madan Kynton U Mon, Laitkor ban ïatai halor ka jing shah khang tihmaw tih shyiap bad ha ka kane ka jingïalang paidbah la wan shim da u Myntri ka sorkar jylla u Bah Banteidor Lyngdoh, u MLA ka Nongkrem bad uba dei ruh u nongai buit jong u Myntri Rangbah ka jylla u Bah Lambor Malngiang bad u MLA ka Mawryngkneng, u Bah Pynïaid Sing Syiem.

Ha ka jingkren jong u, u la kular ba un shimkhia ban pynthikna ba ka sorkar lyngba ka tnad Forest kan kham pynjem ïa ki kyndon kaba ka teh ïa ki par maw, namar kane kan pynïap thngan ïa kiba bun kiba im ja na kane ka kam. Ha ki por kiba la leit nga la ong ïa u ophisar ba lada phi mut wan khang ïa kiba trei parmaw rah lupa bad ka kali kit nongpang namar da u tyrnem shoh maw ngan tied ïa phi, ong u Bah Lambor.

Shuh shuh na ka liang utei u MLA u la ong ruh ba kampher lada ka sorkar ka khang ban tihmaw, hynrei sdang biang noh ban trei ïa kane ka kam bad lada ki wan byrngem ne ai ki notice eiei wat shim, ong beit ba kin leit ai ha u MLA ka Nongkrem. Shuh shuh u la bynrap ba ka kam tih maw kaba ki tih ha kane ka thaiñ kam dei satia kaba pynduh mariang namar ka dei kaba tih tang da ki shniah ki tyrnem u la ong.
“Man ka por ka sorkar ka ong ïeng ha la ki kjat bad ynda ki la ïeng ruh ka khang hi ma ka” ong u Bah Lambor.

Na ka liang pat u Myntri ka sorkar jylla u Bah Banteidor Lyngdoh u la ong ba ka sorkar kam dei ban pynthut ïa ka kamai ki nongbylla sngi namar dei ma ma ki ba long sohpdung ha ki kyndon jong ka bad ba ka liang jong u u la kular ban kren ïa kane ka mat khnang ba ki paidbah kin ym mad jingeh namar u ong ba ka kam tihmaw tih shyiap ha ka jylla ka dei ka kam kaba la sdang naduh la slem bha.

Haba kren sha ki lad pathai khubor na ka liang u President ka JAC u Bah Diswelroy Kharkongngor u la ong ba ki nongtih maw kim dei ban khuslai ïa ki kyndon sorkar hynrei ban sdang trei biang namar ka jingkular ki nongmihkhmat paidbah kata u Bah Pynïaid Sing Syiem, u Bah Banteidor Lyngdoh bad u Bah Lambor Malngiang ban kit khlieh hi ïa kane ka kam.
La sakhi ha kane ka sngi ïa ka jingwan tuid ki paidbah kiba im ja na kane ka kam bad da kawei ka sur ki la rai ban sdang trei biang noh ïa kane ka kam long katba long.