Jyllei ki nongtuh ha sor Jowai

Jowai, 30 Naitung:
Ka kam kyndang iing ki nongtuh ha sor Jowai ka la nangkiew na kawei ka sngi sha kawei pat ha kaba bun tylli ki iing bad ki dukan ki la shah kyndang wat ha ka por mynsngi mynshai.
Mynta ka sngi, kawei ka iing kaba dei trai da u ma Lamjingshai Suchen u ba dei u Secretary ka Mission Compound ka la shah kyndang mynsngi mynshai. Ki nongtuh ki la ioh ban rung shapoh iing hadien ba ki la pynpait ia ki ar tylli ki Tala bad ki la ioh ban rong ei Rs. 3000 tyngka ka pisa, 4 Tola ki jingdeng ksiar kiba kynthup ia 2 tylli ki sahkti, uwei u Loket bad katto katne ki lyngkhot ksiar. Ki la rong ruh ia kawei ka Laptop bad ar tylli ki Mobile Phones.
Katkum ka jingujor sha ki pulit, ki nongtuh ki la kyndang ia katei ka iing hapdeng ka por 12:30 pm bad 1:00 pm. Ka jingduh nong ka la kot haduh kumba 1.80 lakh tyngka.
Shwa ia kane, ka la don ka jingkyndang ia ka iing jong uwei u nongtrei ka Axis bank ha kaba ki nongtuh ki la ioh rong ia kawei ka Camera DSLR kaba shongdor kumba 50 hajar tyngka.
 Shuh shuh ka khu bor ka la iathuh ruh ba ki don ki dukan ha kylleng ka nongbah Jowai ki la shah kyndang bad shah rong tuh ki mar ki mata.
 Kawei ka dukan ha Mookyrdup ruh ka la shah kyndang bad shah tuh. La iathuh shuh shuh bad ki nongtuh ki la law ia ki ar tylli ki shaka jong kawei ka Maruti Car kaba dei trai da u nongialam seng Bhalang  ha Jaintia.