Pynher da ki lama, ba syriem ia ki lama Pakistan rThaba ka jingrakhe Eids ha Jhalupara

Shillong, 29 Naitung:
Ha kine ki khyndiat sngi ba la dep ka la don ka jinglehniam Eid ki riew ngeit Muslim ha nongbah Shillong bad ha katei ka jingleh niam la pynriam pynbeit bad la pynthaba ban pynshong kun ia ka lehniam kiba bunjait ki rong. U nong thohkhubor, u la iohi ba ha Jhalupara ka la don ka jingpynriam pynbeit da kaba wah da ki jingpyn riam ha shi lynter ka surok shnong bad la iohi ba shi bynta na kitei ki jing pynriam la pynphuh pyn phieng da ki lama rong saw rong jyrngam kiba don ka dur u bnai bad u khlur barit, ha kaba la pyndait da ki bun spah tylii, ia kitei ki kynja lama hajrong jong ka surok, thik kumba ia wah lama shongshit elekshon bad kiba dang pur ha ki bynta jong ka shnong Jhalupara, haduh ka janmiet jong ka Sngi Balang.
Haba peit bniah na website ia kitei ki rong lama bad ki shap kiba la don ha ka lama, la iohi thik ba ka dei thik, kum ka lama jong ka Pakistan, hynrei ki don pat kiba ong ba katei ka dak jong ka jingrakhe Eid ki riew ngeit Muslim. Hadien ba la iohi ia kite ki lama u nongthohkhubor u la kylli na ki dukan kiba don marjan bad katei ka jingpynriam ban kylli balei la wah ia kitei ki lama rit bad ki don jingmut aiu, ka jubab kaba la ioh ka long ba la wah ia kitei ki lama naduh ka por ba ki paid riew ngeit Muslim ki rakhe Eid bad haduh mynta ym pat shym la weng ia ka.
Haba la pyrshang ban kylli na ki nongshong shnong jong ka Jhalupara shaphang katei ka lama ki la kubur ba ka dei ka lama jong ka Pakistan, bad ki la iathuh ba ym tang ki lama rit ba la wah ha katei ka jaka, hynrei ki la don ruh ki lama heh kiba la sieh ha tnum ing briew bad ha ki jaka mane blei ki riew ngeit Muslim.
U nongthohkhubor u la ioh ruh ban ia kren bad katto katne ngut ki Khasi kiba shong basah ha katei ka thain ki la pynpaw ka jingsngew tieng bad ki la her syrngiew ban iohi ia kitei ki dak kaba ki riew ngeit Muslim ki la wah da ka lama Pakistan ha Jhalupara. Shuh shuh kiwei pat ki riew paidbah ha ka jingiakren bad u nongthoh khubor ki la ong ba dei tang ha kine ki khyndiat snem ba ki riew ngeit Muslim ki la sdang ban pyni ia ki niam ki dustur jong ki, ha katei ka jaka ha kaba ki la ong ba mynshuwa kim pat ju iohi ia ki kynthei Muslim kiba tap jain iong ha katei ka thain, hynrei ha kine ki ar snem lai snem jan baroh ki kynthei Muslim kiba la don lok ki la tap jain iong ha katei ka thain. Ha kaba iadei bad katei ka jingwah lama Pakistan ha Jhalupara katto katne ki nongshong shnong ki la pynpaw ba lada jia ha katei ka rukom ka sorkar ka dei ban tuklar noh wut wut, balei la pynieng da ka lama Pakistan hapoh u pud u sam ka India.