La dep sdang naduh 6tarik, dang pynbna haduh 22tarik; pan jingshai ka KSU, na u myntri pule puthi halor ka CUET

Shillong:Ka Khasi Students Union (KSU), ka la thoh myn hynnin ka sngi, sha U Ma Lahkmen Rymbui, myntri ka tnat pule puthi ka sor kar Jylla, ha kaba iadei bad ka jingpynlong ia ka eksamin, kaba la tip ka Central University Entrance Test (CUET).

Ka KSU, ka pynsngew ba ka central university entrance test (CUET), ka ban pynlong da ka National testing agency (NTA), ka dei na ka bynta ban pynrung ia ki samla pule sha ka kyrdan under graduate (UG), ha ki University ba pher jong ka sorkar India bad la ong ba kane ka la pynmih ia ka jingsngewkhia kaba jur jong ki samla pule, namar ba la pynbeit ba katei ka eksamin, ka trei kam naduh ka 6tarik Iaiong 2022; katba ia ki samla pule ka jylla, la ai jingtip, ha ka 22tarik Iaiong 2022 bad la bthah ruh ba kin pynrung kyrteng ialade, na bynta katei ka National testing agency (NTA).

Ka KSU, ka pynpaw ruh ia ka jingsngewkhia jongka, ba haba ka University Grant Council, ka la pynbna naduh u snem 2020, hynrei ka tnat pule puthi jong ka sorkar Jylla bad kumjuh ka North Eastern Hills University, kaba dei tang kawei ka University, ba kiba ithuh, ia kiba bun ki kolej, kam shym la pynbeit lypa, na ka bynta ban pynkhreh ia ka jing pyntreikam ia ka CUET bad ban pynsngewthuh ia ki samla pule, ba kin pynkhreh ialade.
Na ka liang ka KSU, ha ka dorkhas jongka, ka dawa na ka tnat pule puthi ka sorkar Jylla, ba kan pynshai halor ka jingthmu jongka, na ka bynta ban pynbeit ia ki jingeh jong ki samla pule, ha kaba ialeh ia katei ka eksamin.

Ka KSU, ka dawa ruh ia u myntri, ia ka University jong ka sorkar jylla, kaba dei kawei na ki jingdonkam ba kongsan bha ia ki samla pule, ha kaba kan ailad ia ki samla pule, lane ia kino kino ki jingeh, kiba lah ban mih ha ki sngi ki ban sa wan, ong ka kyrwoh na U Bah Raymond Kharjana, Chairman ka Education Cell nalor kiwei pat ki dkhot kiba soi kyrteng.