Sngewlem ia u ‘President ki Paidbah’ ha Shillong

Shillong, 29 Naitung:
Ki paidbah mynta ka sngi ki la iatuid ha phyllaw u Soso Tham Auditorium ban sngew lem ia u ‘President ki Paidbah’ u Dr. A. P. J. Abdul Kalam uba la khlad ha ka janmiet sngi Nyng kong ha ka nongbah Shillong.
Ki heh ki hain, ki myntri sorkar, ki ophisar, ki MLA, ki samla ki la ialum lang khrui ha katei ka jaka ban pynpaw ia ki jingsngew lem ia une u President barim ka India.
Haba kren ha kane ka jingialang, u Chief Secretary ka jylla u Bah PBO Warjri u la ong ba ka dei kaei kaei kaba khraw ia ki paidbah kane ka nongbah ban ioh ia kane ka lad ban sngew lem ia u president barim uba ju wan jngoh ruh bunsien ia kane ka nongbah ha kine ki lai snem ba la dep. “Ka jingkhlad noh jongu ka dei ka sakhi ba u ieid ym tang ia ki briew kiba rit hynrei ia kane ka nongbah kaba rit”, la ong u Bah Warjri.
U la ong ba ka jingkhlad noh u Dr APJ Abdul Kalam ka la pynsah thylli ia kane ka juk thymmai ha ka ri.
“Ngi dei ban pyndap ia kane ka jaka ba thylli da kaba bud ia ki jinghikai jongu Dr Kalam” la ong u Chief Secretary.
Katba u Principal Secretary ba peit ia ka Governor Secretariat u MS Rao u la pule ia ka khubor na u Lat ka jylla u bym don ha kane ka jingialang.
 ”Ka jingkhlad noh u Dr Kalam ka ri ka la duh ia u nongshong shnong ba kynsai tam. Ym don jingkhublei ba lah ban pynryngkat ia ka jinglong jong une u riew kynsai ka ri”, la ong u Lat ka jylla ha ka khubor ba la pule da u Rao.
Ha kane ka sngi, la ioh ruh ia ka jingkren na u samla pule ka IIM, Shillong uba la pynpaw ba u Dr Kalam u la ieh na kane ka pyrthei hynrei ki kam bad ki jinghikai jongu kin iaid meh ha ka mynsiem jongki ban bud ia ki jinghikai jong u.
La ioh ruh ia ka jingkren na samla pule ka Lady Kean bad ka St Anthony’s college.
Katba ka nongaibuit ka Lympung Seng Kynthei ka Dr MPR Lyngdoh ka la ong ba u Dr Kalam u dei u riew iohi jngai bad u kwah ban iohi ia ka India ka ri kaba kiew ha ka pyrthei. “U dei shisha u President ki Paidbah”, ka la ong bad ka dei ka kamram jong ngi ban pynurlong ia ka jingangnud jongu.
Ha kane ka jingialang, la pynlong ruh ia ka jingsngap jar kaba arm init ban kynmaw khadduh ia u Dr Kalam.
Phto: Ka jaka test jingbam ha Food and Drugs Testing Laboratories.