Ka Central University Entrance Test(CUET) kan pynkulmar ia ki samla pule mynta u snem

Babu Kular Khongjirem

Ka jingshim rai jong ka sorkar pdeng(Govt.of India) ban pyntreikam noh khala-khala ia ka jingpynrung college/University ia ki khynnah pule kiba pule ha Class XII(Higher Secondary Level) wat haba khlem pat pynbna satia wat tang ia ka Result Class Xii jong ka MBOSE ruh.

Kane kan wanrah ym tang ki jingkulmar jingmut ia ki samla pule hangne ha Meghalaya hynrei kan wanrah ruh ka jingartatien bad ka jinglong kynrum kynram ha ki kmie ki kpa,ki nonghikai haduh ki bor pyniaiad skul bad College naduh sor haduh nongkyndong ruh kumjuh ha une u snem..Katkum katei ka rukom pynrung college thymmai(new admission system),kino kino ki khynnah kiba la pule ha Class Xii ha u snem 2021-22 kiba kwah ban dang bteng biang ia ka jingpule jongki ha ki college ha ka kyrdan BA/BSc/B.Com,etc mynta u snem, kidei ban pynrung kyrteng shwa noh hapoh ka 6th May 2022(last date) lym kumta kin duh ei noh ka jingpule jongki mynta shi snem, kampher, la ki pass ne pheil ia ka Exam Class Xii ba la pyniaid(conducted) da ki bor pyniaid jong ka MBOSE,Tura bad kaban sa pynbna iaka ha ki bnai June ei ei. Ka jingthmu jong katei ka Test kalong ruh ban pynduna ia ka jinglutphut jong ki kmie ki kpa ia ka bai Exam, hynrei, kane kan nangpynlong pynban ka jinglutphut shuh shuh arshah lai shah ia ki kmie ki kpa.Katkum katei ka Test,ka bai pynrung kyrteng kan long Rs550/ shisien test mynstep bad Rs1100/ arsien test,kata, mynstep bad jan miet(both morning and evening shift).

Nalorkata, ki khynnah ki la dep siew lypa ruh 1200/1300 tyngka ka bai Exam jong ka MBOSE por ba ki pyndap phom ban ialeh ia ka Class Xii(Higher Secondary Level).Sa mynta pat kin hap siew biang Rs1100/ ban pynrung kyrteng ia lade ha katei ka Test lym kumta kim ioh pule shuh mynta u snem,kin hap pep skul noh shwa mynta shi snem.Imat, katkum kitei ki kyndon jong katei ka CUET,lada u/ka khynnah ka pheil ia ka class Xii ha ka MBOSE hynrei, ka/u pass pat ia katei ka test,kin ioh bteng beit ban leit pule ia ka Degree level.Hynrei,lada u/ka pass bha ha ka Exam Class Xii jong ka MBOSE hynrei kim ioh pynrung kyrteng pat ia lade ha ka CUET hapoh 06-05-2022,kata, kin duh ei kha ma kha ia ka jingpule jongki mynta u snem 2022. Ki don bun bah hangne ki jingkynthoh halor ka jingbym ler bad jingtlot jong kane ka sorkar MDA ha Meghalaya khamtam ha ka liang ka thoh ka pule bad ka jingnang jingstad(Education) ba la ialam da kata ka party NPP kaba baroh baroh ki nongialam jongngi ki leit noh iap lut sha ka.Ha ka jingshisha,ka Education kadei ka mat ba ia donbor lang hapdeng ka sorkar India bad ka State Govt(Concurrent List).Ka State Govt.ka don la ka jong ka bor ban pyni lada kam sngew iahap ia ki ain ba la thaw da ka sorkar India(kum ha Karnataka kim pdiang).

Hynrei,kane ka sorkar MDA ha Meghalaya pat,mar ia pynmih hukum na Delhi,wut wut khlem pynslem shuh ka pdiang beit khlem da pyrkhat shuh ia kaba bha ne kaban ktah ia ki samla pule jongngi.Ki dei shisha tang kum ki niangkohnguh jong ka sorkar NDA na Delhi.Ym tang kata,ka sorkar ka dei ban pyrkhat ruh ia ka burom bad ka ijot jong MBOSE,ka bor kaba ju pyniaid ia ka Exam class Xii ha Meghalaya namar kam don dor ne don iktiar shuh bad kam don jingmut hi ruh(useless and meaningless) ba kan dang don ka Exam Class Xii jong ka MBOSE haba ki college kim pdiang ne ithuh shuh ia ki sornot bad marksheet jong ki khynnah pule kiba pass Class Xii na MBOSE.Lada kim pass ia kata ka CUET kim ioh rung college shuh.Lada ka long ha kane ka rukom,ka sorkar bad ka MBOSE ki la dei ban pynduh pyndam noh ia ka Exam Class Xii namar kadei tang ka jingpynlut kai,ka jingpynlut ei ia ka por,ka bor bad ka pisa jong ki samla pule bapli namar ym don ba ithuh shuh(not recognised) da ki bor pyniaid cillege naduh mynta u snem.Kumno ki kmie ki kpa ki sngew halor kane? Kumno ki seng bhalang bapher bapher kin ia pyrkhat lem halor kane ka jingeh bad jingleh kyrkieh hak- dak jong ka sorkar khlem pyrkhat shuh ia ka lawei jong ki khynnah pule?Kumno ki paidbah ba bun ki pyrkhat ia kane ka sorkar kaba la pheil lut nadong shadong ha ka liang ka pule puthi (Education) kat haduh ba ki kynhun nonghikai bapher bapher ha ki kyrdan bapher bapher ki la ia pynlong lut ki jingiakhih bapher bapher hynrei, kane ka sorkar pat, ka nangleh kyllut bad leh kput pynban ia ki?

Katba dang don hi ‘ ki khlein la thang ki jwat la bam’ ha kane ka sorkar,ka state jongngi kan nang ngam nang ngam bad nang sniewdur shuh shuh katba nang mih ki sngi ki snem.Ka ktien ka ong,”Na u dek ha ka ding syndon puk” mynta.To ia kyndit bynriew noh shwa ban dier noh ka por ba kordor.