Ka shnong Umbri, ka shnong ba mih thymmai ha Raid Marwet

Nongpoh:Myn ha ka sngi Saitjain, u Paiem Ainam Syiem, Acting Syiem ka Hima Mylliem, ha ryngkat ka jingdon u Ken Syiem, Syiem ka Hima Mylliem, ki la leit ban sha kawei ka jaka kaba don hapoh ka Raid Marwet bad kata ka long ban leit pynbna paidbah ba la mih kawei ka shnong kaba hap hapoh katei ka Raid bad kaba la tip kum ka shnong Umbri.

Lyngba ka jingmih jong katei ka shnong ba thymmai hapoh ka Raid Marwet, ka la nangkyntiew shuh shuh ia ka jingdon ki shnong hapoh katei ka Raid bad ha katei ka sngi kaba la leit ban pynbna ba la ithuh ia ka Umbri ba kan long kum kawei ka shnong hapoh katei ka Raid, ka la long shisha ka jingkmen kaba khraw eh ia ki paidbah kiba shong ba sah ha katei ka jaka bad kaba la ithuh mynta kum ka shnong kaba pura.
Hadien ba la ithuh ia ka Umbri kum ka shnong kaba pura, la jied ia u L. Marak kum u rangbah shnong jong katei ka shnong bad u bah E. Nongrum kum u Secretary jong katei ka shnong.

Ki nongialam ka Hima Mylliem bad Raid Marwet, hadien ba la pynbna ba la ithuh pura ia ka Umbri kum ka shnong kaba pura, ki la aibor ha kitei ki nongialam kiba la shah jied ban long kum ki nongialam shnong ba kin trei ia ki kam ki jam, khamtam eh na ka bynta ban wanrah ia ka roi ka par hapoh katei ka shnong bad ka ban long ka jingkyrkhu ia ki paidbah kiba shong ba sah ha katei ka shnong.