Ka ishu pynbeit pud sha Supreme Court

Ka ishu pynbeit pud, ka nang jyrwit ha kine ki sngi bad ka daw, ka long ba ka sorkar jylla, kam kwah shuh ban dang iakren biang, ia kaba la dep iasoi hapdeng ki ar ngut ki myntri rangbah ka Assam bad ka Meghalaya bad nangta, sa kawei pat ka mat, ka long ba ki khlieh nongsynshar, ki pynkhreh ban leit mudui ia katei ka kam sha Supreme Court.

Haba peit na ka jingkren ki heh ki hain jong ka sorkar jylla, la iohi, ba katei ka kam ka jyrwit bha bad kawei na kita, ka long halor ka jingbud jongki, ia ka map jong u snem 2011, kaba dei ka kam jong ka Congress bad U Tarun Gogoi bad katei ka la dei, ban nym iasnoh eiei bad ka map jong ka BJP, NPP.

La iohsngew mynta, ba ki sdang ban sait kti ia ki kot ki sla, kiba don ha ki hima lane ha ki briew shimet bad hangne ruh, ka wan pynban ka jingiakren, kaba ngi ju ong “La ka mih shwa ka pylleng ne ka mih shwa ka syiar” bad hangne ruh, lada jia ba kim pdiang ia ki kot ki sla kiba ki hima ki don, kumta kumno sha, u mih u pud hapeng ka Assam bad ka Meghalaya, haba kiba bun ki jaka, ki dei ki bym pat register ha ka sorkar jylla bad kam dei tang katta, hynrei ka jingdon u pud uba mynta, ka dei lyngba ki dulir bad ki jingshisha kiba mynshwa bad kiba la ia bud, naduh ka por jong ki Khasi State.

Kam kut tang katta, ka Supreme Court of India, ka ithuh ia ka dulir jaka kaba 30hajar square feet jong ki kur Thangkhiew, kaba ha Them Marwet bad katei kajuh ka jaka, ka dei ban hap noh mynta sha Assam bad haba kumta, ka Supreme Court, kumno kan shu pdiang ia ka mukotduma, lada kam ieng ha ki dulir kiba thikna.
Ki don shibun ki jaka kiba shynna bha ka jinglong trai jong ki Khasi bad kitei ki kynthup ia ka jaka sah ka Indira Gandhi, kaba 11,210.70 square metre bad kaba dei hok, ka jaka jong ki Khasi, hynrei, ia katei ruh, la pynhap jubor sha Assam.

Haba iakren ia kane ka mat, hap kynmaw ia ka jingkren U Himanta Sarma, uba la ong dangshen “Ym lah ban pynhun ia baroh, hynrei, ngi hap ban sngewthuh ba ka Ri, ka hun bad ka suk (Everyone cannot be made happy, we should ensure the nation is happy) bad kitei ki jingkren, ki don ia u ksai uba jrong bha.
Lada ki hima, kin leit sha Supreme Court, hangta ngin iohi, ba lada ia ka ophis ka ASTC, la pyn sangeh, khlem pep, ia kiwei ki jaka, yn sa nang jubor bha, ka jing iatan tyllai ha kashari.