Ki nongialam, kiba rim ki shongthait donburom

Da ka jingkhlad jong U bah JD Rymbai, myntri rangbah barim ka jylla, ka wan rah ia ki jing kynmaw, ba ki nongialam kiba rim, ki da shongthait donburom bad hadien ki don kiba la khlad noh bad ki don kiba dang im tymmen, shongprah shongshang.

U bah SD Khongwir, uwei na ki nongialam ba la iaw bha ha ka sain hima sima, u la shongthait hun mynsiem, hadien ba ula shakri la 25snem kum U MLA jong ka Mawlai, nangta U bah JD Rymbai, uba la shakri, la bun snem kum U MLA ka Jirang, U Bah PR Kyndiah ruh, ula iehnoh ia ka kam ialeh elekshon, haba ula sngewthuh ba ka por jongu, kam shah shuh.

U bah BB Lyngdoh, ula shakri la bun phew snem, kum u nong ialam paidbah, hynrei, ula shongthait noh, haba u sngew ba ka por jongu, kam dei shuh, ba un dang ialeh elekshon bad U bah DD Lapang, ruh, um shym la mih shuh ban ialeh elekshon, haba u sngew ba um lah shuh ban ai, ia ka jing shakri kaba pura ia u paidbah.
Ka jingthoh ia kane ka phang, ha kane ka kynti, ka long, ba ki nongialam kiba rim (imat) ki shim, ba ka kam MLA/MP, ka dei ka kam shakri bad kam dei satia, ka kam business jongki bad haba kren ia katei ka mat, hap ban ainguh let, ia kitei ki nongialam haneng, ba kim don ia ki khun jongki, ki pyrsa jongki, kiba mih bujli ia ka kam jongki, lane kiba la khie spah, naba ki don ia ia ki kpa jongki, kiba la bat ia ki shuki ba heh, ha ka sorkar jylla ne sorkar India.

Ha kane ka juk thymmai, ngi iohi, ba ki nongialam kim juh neh, hynrei ki shah kynjat khah khah, ha u paidbah bad nangta, kito kiba la jop elekshon, shisien, arsien, ki la sdang nyngkong ban thied iing thied sem, ki thied jaka puta, ki phah skul, ia la ki khun sha ki skul kiba lutphut shi katdei (sha Delhi, Bangalore bad wat shabar India) bad nangta sa ka jingshah kynnoh tuh, kaba shu pur sawdong ka jingim jongki.
Ha kaba kum kane ka por, ka la dei ruh ia u paidbah, ba un niew burom ia ki nongialam kiba rim, lada dei U bah GG Swell, Bah HS Lyngdoh, kiba shim ia ka kam paidbah, kum ka jingshakri bad ba kam dei satia, kum ka jing kamai spah ialade bad ia la ki jong ki khun ki tnga.